ठाणे – अंगणवाडी कर्मचाऱ्यांच्या मानधनात वाढ करणे, निवृत्तीवेतन दर महिना देणे, नवीन मोबाईल देणे, पोषण आहाराची रक्कम वाढविणे या मागण्यांसाठी महाराष्ट्र राज्य अंगणवाडी कर्मचारी संघाच्या वतीने महाराष्ट्रव्यापी बेमुदत संप ४ डिसेंबरपासून पुकारण्यात आला आहे. यासंबंधीचे नोटीस देण्यासाठी अंगणवाडी कर्मचारी ठाणे जिल्हा अधिकारी कार्यालयाबाहेर जमले होते. यावेळी त्यांनी मुख्यमंत्री कार्यालयात ही नोटीस दिली.
सर्वोच्च न्यायालयाच्या निर्णयानुसार अंगणवाडी कर्मचारी हे ग्रॅच्यूईटी मिळण्यास पात्र आहेत. परंतु, दोन वर्षे उलटून गेले तरी केंद्र सरकारने सर्वोच्च न्यायालयाच्या या निर्णयाची अंमलबजावणी केलेली नाही. या अंगणवाडी कर्मचाऱ्यांना दर महिना अर्ध्या मानधनाएवढी रक्कम निवृत्तीवेतन म्हणून देण्याचे राज्य सरकारने मान्य केले आहे. अद्यापही या निर्णयाची अंमलबजावणी केलेली नाही. तसेच अंगणवाडी केंद्रातील बालकांना पूरक पोषण आहाराकरिता देण्यात येणाऱ्या रक्कमेत वाढ करावे, तसेच अंगणवाडी कर्मचाऱ्यांना मोबाईल देण्याचा आदेश मुंबई उच्च न्यायालयाने ४ महिन्यांपूर्वी दिला आहे. परंतु, राज्य सरकारमार्फत अंगणवाडी सेविकांना अद्याप मोबाईल दिलेले नाही. या मागण्यांसाठी राज्यातील २ लाख अंगणवाडी कर्मचाऱ्यांनी ४ डिसेंबरपासून बेमुदत संप पुकारला आहे.
हेही वाचा – ठाणे : दिव्यात ठाकरे गटाचा प्रभाग समितीवर मोर्चा, पाणीटंचाई समस्या दूर करण्याची मागणी
हेही वाचा – डोंबिवलीतील वास्तुविशारद संदीप पाटील यांच्या जिवाला भूमाफियांकडून धोका
यासंदर्भातील नोटीस ठाणे जिल्ह्यातील मुख्यमंत्री कार्यालयात देण्यासाठी ठाणे जिल्ह्यातील अंगणवाडी कर्मचारी शुक्रवारी ठाणे जिल्हाधिकारी कार्यालयाबाहेर जमले होते. यावेळी शिष्टमंडळाने ठाणे जिल्हाधिकारी कार्यालयातील मुख्यमंत्री कार्यालयात जाऊन बेमुदत संपाची नोटीस दिली.
