Measles rubella vaccination 2025 : ठाणे जिल्ह्यात गोवर-रुबेला लसीकरण मोहिम राबविणार; ५ ते १५ वर्षे वयोगटातील सर्व बालकांचे होणार लसीकरण…

गोवर हा विषाणूमुळे होणारा साथीचा आजार आहे. त्याच्या गुंतागुंतीत अंधत्व, मेंदुज्वर, अतिसार, कानाचे आणि श्वसन संक्रमण (निमोनिया) दिसून येते. रुबेलामुळे गर्भवती स्त्रियांमध्ये व नवजात बालकांमध्ये गंभीर परिणाम होऊ शकतात.

या आजारांवर विशिष्ट उपचार उपलब्ध नसले तरी (एमआर) लसीकरण हे सर्वात प्रभावी संरक्षण आहे. त्यामुळे गोवर-रुबेला लसीकरणाचे प्रमाण ९५% पेक्षा जास्त साध्य करणे, एमआर लसीच्या दोन डोसमधील ड्रॉप आऊट रेट शून्यापर्यंत आणणे, गोवर नसलेला आणि रुबेला नसलेला डिस्चार्ज रेट प्रति लाख लोकसंख्येमध्ये २ किंवा त्याहून जास्त साध्य करणे असे या मोहीमेचे ठाणे जिल्ह्यात उद्दिष्ट आहे. त्यामुळे लसीकरण मोहीमेची अंमलबजावणी योग्यरित्या करण्यासाठी या मोहिमेत आरोग्य विभागासोबत शिक्षण विभाग, आदिवासी विकास विभाग, अल्पसंख्याक विभाग आणि महिला व बालविकास विभाग सक्रिय सहभाग नोंदवणार आहेत. जिल्ह्यातील लाभार्थी संख्येनुसार एकूण २१ हजार ४५० डोस लस उपलब्ध असून, सर्व प्राथमिक आरोग्य केंद्रांवर साठा ठेवण्यात आला आहे.

“या मोहिमेचे यशस्वी होणे म्हणजे जिल्ह्यातील प्रत्येक बालकाचे सुरक्षित भविष्य घडविणे होय. एकही बालक लसीकरणापासून वंचित राहणार नाही, याची विशेष काळजी घेण्यात येणार आहे. पालक, शिक्षक आणि ग्रामस्थांनी सहकार्य करून ही मोहीम यशस्वी करावी,” असे आवाहन जिल्हा आरोग्य अधिकारी डॉ. गंगाधर परगे यांनी केले आहे.

लसीकरण कुठे आणि कसे असणार ?

• ३९ आश्रमशाळांतील १४ हजार १२३ बालकांचे MR लसीकरण चुकले असल्यास किंवा तारखा माहित नसल्यास त्या बालकांना एक डोस देण्यात येईल.
• प्रत्येक आश्रमशाळा/मदरशामध्ये लसीकरण सत्रांचे आयोजन करण्यात येईल. एका चमूद्वारे दिवसाला १५० बालकांचे लसीकरण केले जाईल.
• प्रत्येक चमूमध्ये ६ सदस्य असतील १ समुदाय आरोग्य अधिकारी, १ लस टोचक, १ आरोग्य सहाय्यक/एलएचव्ही, १ अंगणवाडी कार्यकर्ती, १ आशा आणि १ स्वयंसेवक.
• केवळ प्रशिक्षित कर्मचारीच लसीकरण करतील.