निवडणुका पालिकेच्या, परीक्षा आमदारांची!

लांडगे, चौधरीही बढतीच्या प्रतीक्षेत
आमदारांप्रमाणेच शिवसेनेचे कल्याण जिल्हाध्यक्ष गोपाळ लांडगे तसेच अंबरनाथचे मावळते नगराध्यक्ष सुनील चौधरीही एखाद्या महामंडळात अथवा विधान परिषदेत वर्णी लागावी, अशी अपेक्षा बाळगून आहेत. अल्पमतात असलेली अंबरनाथची सत्ता इतर पक्षांच्या मदतीने पाच वर्षे कायम राखण्यात सुनील चौधरी यांचा महत्त्वाचा वाटा आहे. आता नगराध्यक्षपद भूषविल्यानंतर पुन्हा पालिकेच्या राजकारणात जाण्यात त्यांना रस नाही. विधानसभा निवडणुकीत कल्याण पूर्वमधून गोपाळ लांडगे पराभूत झाले असले तरी कल्याण लोकसभा क्षेत्रात त्यांनी पक्षासाठी दिलेले योगदान दुर्लक्ष करण्याजोगे नाही. त्यामुळे आमदारांप्रमाणेच हे दोघेही निवडणुकीच्या कामगिरीवर बढती मिळण्याच्या प्रतीक्षेत आहेत.

अंबरनाथमध्ये बिनविरोध निवडीचा विक्रम
अंबरनाथ : उमेदवारी अर्ज मागे घेण्याच्या अखेरच्या दिवशी अंबरनाथ शहरात एकूण पाच प्रभागांमध्ये निवडणुका बिनविरोध झाल्या असल्याचे स्पष्ट झाले आहे. बिनविरोध निवडीचा हा विक्रम असून त्यातील चार जागा शिवसेनेने तर एक जागा काँग्रेसने पटकावली आहे. अंबरनाथ शहरात एकूण ५७ प्रभाग आहेत. त्यातील पाच प्रभागांमध्ये आता निवडणुका होणार नाहीत. त्यामुळे निवडणूक यंत्रणेवरील ताण काही प्रमाणात कमी होणार आहे. २२ एप्रिल रोजी ५२ प्रभागात निवडणुका होतील. प्रभाग क्र. ९ मधून (खामकर आळी परिसर) शिवसेना शहरप्रमुख अरविंद वाळेकर यांचे पुत्र निखील वाळेकर यांची तर प्रभाग क्र. १४ मधून (बालाजीनगर) त्यांच्या पत्नी मनीषा वाळेकर बिनविरोध निवड झाली आहे. मनीषा वाळेकर यांची तिसऱ्यांदा नगरसेविका म्हणून निवड झाली आहे. अंबरनाथच्या पालिकेत प्रथमच आई आणि मुलगा निवडून गेले आहेत. प्रभाग क्र. १३ खुंटवली गावठाण-मेटननगर येथून शिवसेनेचे उत्तम अहिवळे विनबिरोध निवडले गेले आहेत. त्याचप्रमाणे कोहोज गावातून (प्रभाग क्र. १६) काँग्रेसचे उमेश पाटील प्रतिस्पर्धी उमेदवाराने माघार घेतल्याने बिनविरोध निवडले गेले आहेत. पाले गावातून (प्रभाग क्र. ५६) शिवसेनेच्या योगिता नितीन वारिंगे यांचा एकमेव उमेदवारी अर्ज दाखल झाला होता. दिवंगत नगरसेवक नितीन वारिंगे यांच्या त्या पत्नी आहेत.

भाजप उमेदवारावर आचारसंहिता भंगाचा गुन्हा
ठाणे : बदलापुरातील प्रभाग क्र. १४ मधून निवडणूक लढविणारे भाजपचे अधिकृत उमेदवार किरण भोईर व त्यांचे पिता काँग्रेस नेते शंकर भोईर यांच्यासह ५० जणांवर परवानगी न घेता प्रचार रॅली काढल्याबद्दल गुन्हा दाखल केला आहे. रविवारी रात्री ८ वाजता बदलापूर एसटी डेपोसमोरील रस्त्यावर भोईर यांनी प्रचारार्थ रॅली काढली होती, परंतु या रॅलीसाठी पोलीस परवानगी घेण्यात आली नव्हती. त्यामुळे हा गुन्हा दाखल केल्याचे पोलिसांनी स्पष्ट केले.