शहापूर तालुक्यात बालविवाह रोखण्यात पोलिसांना यश; या प्रकरणात पाच जणांवर गुन्हा दाखल तर, चौघांना अटक

पुणे जिल्ह्याच्या जुन्नर तालुक्यात असलेल्या बाबूलवाडी गावात राहणाऱ्या जय लक्ष्मण शिर्के या तरुणाशी शहापुर तालुक्यातील खैरे गावात राहणाऱ्या एका आदिवासी मुलीशी लग्न ठरले होते. याबाबत तक्रार दाखल झाल्यानंतर किन्हवली पोलिस ठाण्याचे सहाय्यक पोलीस निरीक्षक नितीन खैरनार यांनी खैरे गावातील आनंदवाडी येथे जाऊन याप्रकरणाची चौकशी केली असता, मुलीचा जन्म १७ ऑगस्ट २००८ सालचा असल्याने मुलगी अल्पवयीन असल्याचे स्पष्ट झाले. मुलीचे वय पूर्ण नसल्याचे माहित असूनही दोन्ही कुटुंबांनी विवाह ठरवला होता. या चौकशीत मुलीचे वडील दत्तात्रेय विठ्ठल वातेस यांनी आर्थिक अडचणीमुळे नातेवाईकांच्या मदतीने लग्न ठरवल्याची कबुली दिली. ५ ऑक्टोबर २०२५ रोजी जुन्नर येथे विवाहसोहळा पार पडणार होता. मुलीच्या घरी ०४ ऑक्टोबरला रीतीरिवाजानुसार हळदीचा कार्यक्रम सुरू असताना, किन्हवली पोलिसांनी हस्तक्षेप करून हा प्रकार थांबविला.

या गुन्ह्यात मुलीचे वडील दत्तात्रेय वातेस, लग्नात मध्यस्थी केलेले प्रकाश मुकणे, जय शिर्के आणि लक्ष्मण शिर्के या चार जणांना अटक करण्यात आली, असल्याची माहिती किन्हवली पोलिसांनी दिली. पिडीत मुलगी अल्पवयीन आणि अनुसूचित जमातीतील असल्याने जय शिर्के आणि त्याचे वडील लक्ष्मण शिर्के यांच्या विरोधात बालविवाह प्रतिबंधक कायदा तसेच अट्रोसिटी कायद्यान्वये किन्हवली पोलीस ठाण्यात गुन्हा दाखल झाला असून पुढील तपास उपविभागीय पोलीस अधिकारी करीत आहेत.