ठाण्यात क्लस्टरचा वाद हाणामारी पर्यंत

याप्रकरणी चितळसर पोलीस ठाण्यात १५ हून अधिक जणांविरोधात गुन्हे दाखल झाले आहेत. ठाण्यात झोपडपट्टी भाग, अनधिकृत इमारतींना क्लस्टर योजनेत सामावेश करुन त्यांचे पूनर्वसन केले जाणार आहे. परंतु या योजनेला अनेकजणांनी विरोध केला आहे. त्यामुळे ठाण्यातील अनेक भागात क्लस्टर समर्थक आणि क्लस्टर विरोधक अशी दोन गट पडले आहेत. काही ठिकाणी संस्था-संस्थांमध्ये वाद आहेत. अनेकदा हा वाद शिवीगाळ पर्यंत जात असतो. ठाण्यातील वसंत विहार येथील जवाहरनगर परिसरात आनंद बाजार गृहनिर्माण संस्था (नियोजित) आहे. या संस्थेबाबत येथील काही रहिवाशांमध्ये मतभेद आहेत.

शुक्रवारी सकाळी या भागात क्लस्टर संदर्भात एक बैठक बांधकाम व्यवसायिकाच्या प्रतिनिधीसोबत आयोजित करण्यात आली होती. बैठकीस १०० सदस्य उपस्थित होते. या बैठकीस संस्थेसोबत मतभेद असलेले देखील उपस्थित होते. त्यांनी या बैठकीस आक्षेप घेण्यास सुरुवात केली. दोन्ही गटात वाद झाल्यानंतर हे वाद मिटविण्यात आले. त्यानंतर सर्वजण बैठकीतून निघून गेले. सायंकाळी बैठकीनंतर जेवणासाठी अनेकांना निमंत्रण होते. त्यामुळे काहीजण जेवण्यासाठी तेथे गेले होते.

बेदम मारहाण

सायंकाळी बैठकीत जेवल्यानंतर संस्थेचे अध्यक्ष आणि त्यांचा मुलगा हे घरी परतत असताना, त्यांना काहीजणांनी रस्त्यातच अडविले. तसेच लाथा-बुक्क्यांनी मारहाण सुरु केली. मारहाण करणाऱ्यापैकी एकाकडे राॅड होता. त्यावेळी वाद सोडविण्यासाठी बैठकीत उपस्थित आणि बांधकाम व्यवसायिकाचे प्रतिनिधी आले असता, त्यांनाही मारहाण झाल्याचा दावा तक्रारीत करण्यात आला आहे. या घटनेनंतर त्यांनी चितळसर पोलीस ठाण्यात तक्रार दाखल केली. या तक्रारीच्या आधारे भारतीय न्याय संहिता (बी एन एस), २०२३ चे कलम ११५ (२), ११८ (१), १८९ (१), १८९ (२), १८९ (४), १९०, १९१ (२), १९१ (३) प्रमाणे गुन्हा दाखल झाला आहे.