ठाणे जिल्ह्य़ावरील पाणी संकट टळले

बारवी काठोकाठ भरले, आंदरमध्येही ६४ टक्के जलसाठा
ऑगस्ट महिन्यातच बारवी धरण भरून वाहू लागल्याने तसेच पुण्यातील आंदर धरणात गेल्या वर्षीच्या तुलनेत आताच जवळपास दुप्पट पाणीसाठा असल्याने ठाणे जिल्ह्य़ातील शहरी भागांमधील पाणी संकट टळल्यात जमा आहे. बारवी आणि आंदर या दोन्ही धरणात समाधानकारक जलसाठा असला तरी नियोजनाच्या दृष्टीने २० टक्के पाणीकपात पुढील काळातही कायम राहील, अशी माहिती पाटबंधारे खात्यातील सूत्रांनी दिली.
मुरबाड तालुक्यातील एमआयडीसीचे बारवी धरण आणि पुणे जिल्ह्य़ातील टाटाच्या आंदर धरणातून उल्हास नदीत सोडल्या जाणाऱ्या पाण्याद्वारे ठाणे जिल्ह्य़ातील शहरी भागांना पाणीपुरवठा करण्यात येतो. गेल्या वर्षी अपुऱ्या पावसामुळे बारवी धरण भरलेच नव्हते. पुण्यातील आंदर धरणातही जेमतेम ५० टक्के इतकाच जलसाठा होता. यंदा मात्र ऑगस्ट महिन्यातच बारवी धरण शंभर टक्के भरले आहे. विशेष म्हणजे चार मीटरने उंची वाढल्याने यंदा बारवीमध्ये ४० टक्के अधिक जलसाठा आहे. तसेच पुण्यातील आंदर धरणातही ६४ टक्के पाणीसाठा आहे. मान्सूनचा एकदीड महिना अजून शिल्लक असल्याने आंदरच्या पाणीसाठा वाढण्याची शक्यता आहे. त्यामुळे तूर्त यंदा तरी ठाणेकरांना भीषण पाणीटंचाई सोसावी लागणार नाही, हे एव्हाना स्पष्ट झाले आहे.