भारत दौऱ्यावर असलेले इस्रायलचे पंतप्रधान बिन्यामिन नेतान्याहू बुधवारी अहमदाबादमध्ये पोहोचले. अहमदाबाद ते साबरमती आश्रम असा भव्य रोड शो केल्यानंतर नेतान्याहू यांनी सपत्नीक साबरमती आश्रमाला भेट दिली. याठिकाणी त्यांनी गांधीजींशी निगडीत गोष्टींची माहीती घेतली. आश्रम पाहून झाल्यावर नेतान्याहू यांनी आश्रमातील अभिप्रायाच्या वहीवर आपली प्रतिक्रियाही नोंदवली. मात्र पंतप्रधान पदावर असणाऱ्या या व्यक्तीकडून यावेळी एक मोठी चूक झाली. नेतान्याहू यांची ही चूक सोशल मीडियावर मोठ्या प्रमाणात ट्रोल होत असून त्याविषयीच्या उलट-सुलट चर्चांना उधाण आले आहे. मानवतेचा संदेश देणारे महान व्यक्तिमत्त्व महात्मा गांधी यांच्या आश्रमाचे दर्शन अतिशय प्रेरणादायी होते. नेतान्याहू यांनी इंग्रजीमध्ये लिहीलेल्या या संदेशामध्ये त्यांनी गांधी यांच्या नावाचे स्पेलिंग चुकवले. त्यामुळे त्यांना ट्विटरवर नेटीझन्सकडून ट्रोल करण्यात आले. आश्रमातील भेटीच्यावेळी नेतान्याहू यांनी गांधींचा चरखा चालवून पाहिला, तसेच पतंगही उडविला. मोदींनी नेतान्याहू यांना पतंगाविषयी माहिती दिली. आपल्या ६ दिवसांच्या भारत दौऱ्यातील तिसऱ्या दिवशी नेतान्याहू यांनी ताजमहालाचेही दर्शन घेतले. यावेळी पत्नी सारासोबत त्यांनी ताजमहालसमोर अनेक फोटोही काढले. दरम्यान, नेतान्याहू यांच्या भारत दौऱ्यात दोन्ही देशांमध्ये नऊ करार झाले. तेल व वायू, चित्रपट सहनिर्मिती, हवाई वाहतूक सुधारणा अशा विविध क्षेत्रांसंदर्भातील करारांचा यात समावेश आहे. नेतान्याहू यांच्या या दौऱ्यामुळे कृषी, तंत्रज्ञान आणि सुरक्षा यांसह अनेक क्षेत्रात इस्रायल व भारत यांचे सहकार्य वाढेल, असे मोदींनी म्हटले आहे.
