पत्रकार अर्णब गोस्वामी यांच्याशी केलेल्या गैरवर्तनानंतर चार विमान कंपन्यांनी बंदी टाकल्यामुळे स्टँड-अप कॉमेडियन कुणाल कामरा सध्या चांगलाच चर्चेत आहे. आता महाराष्ट्र नवनिर्माण सेनेचे अध्यक्ष राज ठाकरे यांना वडापावद्वारे 'लाच' देण्याचा त्याने प्रयत्न केला आहे. कुणालने चक्क राज ठाकरे यांना किर्ती कॉलेजच्या वडापावची 'लाच' देत आपल्या कार्यक्रमात हजेरी लावण्यासाठी विनंती केली आहे. ‘Shut Up Ya Kunal’ या आपल्या युट्यूबवरील लोकप्रिय कार्यक्रमासाठी कुणालने मनसे अध्यक्ष राज ठाकरे यांना आमंत्रित केले आहे. कुणाल कामराने शिवाजी पार्कजवळ राज ठाकरे यांच्या 'कृष्णकुंज' निवासस्थानाबाहेर हातात वडापाव घेऊन फोटो काढला आहे. यासोबत, माझ्या कार्यक्रमात हजेरी लावावी यासाठी मनसे अध्यक्षांचं लक्ष आकर्षित करण्याचा प्रयत्न करत असल्याचंही त्याने म्हटलंय. हा फोटो आणि त्यासोबत राज ठाकरेंसाठी लिहिलेलं एक पत्र स्वतः कुणाल कामराने ट्विट केलं आहे. त्या पत्रात, "मी तुमच्याबाबत केलेल्या अभ्यासामध्ये तुम्हाला किर्ती कॉलेजचा वडापाव खूप आवडतो असं कळलं, त्यामुळे तुम्हाला लाच म्हणून तोच वडापाव आणला आहे. किमान आता तरी तुम्ही माझ्या Shut Up Ya Kunal या कार्यक्रमात येण्यासाठी वेळ द्यावी" अशी विनंती कुणालने राज यांना पत्राद्वारे केली आहे. Sir @RajThackeray Abhi toh date de do mujhe For all the people who think I’ve to not hussle to get guests on my podcast. here’s how much I do & I’m willing do even more to produce good content for you guys. Because I love you :) pic.twitter.com/ceATLy6iF5 — Kunal Kamra (@kunalkamra88) February 3, 2020 यापूर्वी, विधानसभा निवडणुकांदरम्यानही कुणाल कामराने राज ठाकरेंना आपल्या कार्यक्रमात येण्याचे आमंत्रण दिले होते. दरम्यान, आता मनसे अध्यक्ष राज ठाकरे कुणालच्या या कार्यक्रमाचे निमंत्रण स्वीकारणार का, याकडे सर्वांचे लक्ष लागले आहे.