जसा देश तसा वेश, इंग्लडच्या पंतप्रधान चक्क साडीत

इंग्लडच्या पंतप्रधान थेरेसा मे यांच्या साडीतल्या फोटोंची सध्या खूपच चर्चा आहे. जसा देश तसा वेश ही म्हण थेरेसा यांनी पूरेपूर साध्य करून दाखवली. सध्या मे या भारताच्या दौ-यावर आहेत. बंगळुरुतल्या प्रसिद्ध आणि ऐतिहासिक मंदिरात त्या चक्क साडी नेसून गेल्या. त्यांनी श्री सोमेश्र्वरा स्वामी मंदिराला भेट दिली. यावेळी भारतीय पद्धतीची साडी, डोक्यावर टिकली लावून थेरेसा यांनी सोमेश्र्वरा स्वामींचे दर्शन घेतले. भारतीय वेशात अत्यंत सुंदर दिसत असलेल्या थेरेसा यांचे सोशल मीडियावर खूपच कौतुक होत आहे. थेरेसा यांचे साडीवर विशेष प्रेम आहे. आधीही त्यांनी एका कार्यक्रमात साडी परिधान केली होती. निळ्या साडीतील थेरेसा यांच्या फोटोंची तेव्हाही सोशल मीडियावर चर्चा होती. सोमवारी थेरेसा यांनी पंतप्रधान नरेंद्र मोदी यांची भेट घेतली होती. ब्रिटन आणि भारत यांच्यातील व्यापारी संबध वाढावे यासाठी ही भेट महत्त्वाची मानली जाते.