Shocking Video: वर्षानुवर्षं मुलींवरच्या अत्याचारांची संख्या वाढतच चाललीय. सोशल मीडिया, वृत्तपत्रं, बातम्या यांद्वारे आपल्याला या सगळ्याची माहिती मिळते आणि माणूस म्हणून आपण कुठेतरी चुकतोय याची खंत वाटते. आजही देशात महिला असुरक्षित आहेत. अत्याचार करणारी विकृत माणसं दिवसाढवळ्या उघडपणे फिरतात. भररस्त्यात सगळ्यांसमोर महिलांची छेड काढतात, त्यांच्यावर हल्ला करतात. आणि या सगळ्यात ते काही चुकीचं करतायत असं त्यांना वाटतही नाही.
अशा परिस्थितीत काही मुली आपल्यावर होणाऱ्या अत्याचाराविरुद्ध आवाज उठवतात, तर काही जणी तसाच अत्याचार सहन करत घाबरून शांत बसतात. सध्या अशीच भयंकर घटना एका तरुणीबरोबर घडलीय ज्याचा व्हिडीओ सोशल मीडियावर व्हायरल होतोय. या व्हिडीओमध्ये बसमध्ये एक माणूस तरुणीबरोबर असभ्य वर्तन करताना दिसतोय. नेमकं काय घडलं, जाणून घ्या…
व्हायरल व्हिडीओ (Kerala Woman Harassment Viral Video)
केरळमधील एका कंटेंट क्रिएटरने बस प्रवासात तिच्याबरोबर घडलेल्या धक्कादायक घटनेचा व्हिडिओ शेअर केला आहे. यात एक माणूस सतत तिच्याकडे चुकीच्या नजरेने बघताना दिसतो. या व्हिडिओत पारंपरिक केरळ साडी नेसलेली महिला बसमध्ये बसलेली दिसते. तिच्या शेजारी एक मध्यमवयीन माणूस बसलेला असतो. तो वारंवार तिच्याकडे चुकीच्या नजरेने बघताना दिसतो. हे सर्व ती महिला आपल्या मोबाईलच्या सेल्फी कॅमेऱ्यात रेकॉर्ड करते. ती त्याच्याकडे बघत आहे हे माहीत असूनही तो काहीच घडले नाही असे दाखवतो. थोडावेळ नजर वळवतो आणि नंतर बिनधास्त तसेच वागणे सुरू ठेवतो.
“जर तू माझ्याकडे चुकीच्या नजरेने पाहिलंस, तर तुझे डोळे बाहेर येतील. असं मी वाघिणीसारखं बोलले. हा व्हिडिओ मी टाकला कारण काही लोक म्हणतात कपडे हेच अशा कृत्याचं कारण आहे! पण या व्हिडिओत मी पूर्ण झाकलेले, साधे पारंपरिक कपडे घातले आहेत. आता सांगा, अजूनही कपड्यांचा प्रश्न आहे का? खरं तर प्रश्न तुमच्या बघण्याच्या नजरेत आहे,” असं कॅप्शन तिने लिहिलं.
कमेंट्समध्ये तिने सांगितले की त्या माणसाने नंतर तिला चुकीच्या प्रकारे स्पर्श केला. त्यावर तिने लगेच त्याला मारले. तिच्या या कृतीनंतर तो माणूस पटकन बसमधून उतरला आणि पळून गेला. तिने पुढे सांगितले, “मी पूर्ण आत्मविश्वासाने सांगते, माझ्या कपड्यांमध्ये काहीही चुकीचे नव्हते. हा एक मानसिक आजार आहे, विकृती आहे!”
सोशल मीडियावर व्हायरल झालेला व्हिडीओ @brut.india या इन्स्टाग्राम अकाउंटवरून शेअर करण्यात आला असून, सध्या तो मोठ्या प्रमाणावर व्हायरल होत आहे. तसंच व्हिडीओ व्हायरल होताच त्याला तब्बल ३ मिलियन व्ह्युज आले आहेत.
युजर्सच्या प्रतिक्रिया
सोशल मीडियावर हा व्हिडीओ व्हायरल होताच अनेकांनी त्यावर आपापल्या प्रतिक्रिया दिल्या आहेत. एका युजरनं कमेंट करत लिहिलं, “महिलांसोबत हे असं रोज घडतं” तर दुसऱ्यानं “लोक अनेकदा प्रश्न विचारतात की, महिलांना स्पेशल कोचची गरज का आहे तर यासाठी” अशी कमेंट केली. तर एक जण कमेंट करत म्हणाला, “हा व्हिडीओ शेअर केल्याबद्दल धन्यवाद”
