मुंबईसह देशातील अनेक भागांमध्ये जोरदार पाऊस आणि वाऱ्यामुळे परिस्थिती चिंताजनक झाली आहे. याच वातावरणात एका धक्कादायक घटनेचा व्हिडीओ सोशल मीडियावर व्हायरल झाला आहे, ज्यामध्ये एका रिक्षाचालकाचे प्राण नशिबाने वाचले आहेत. काही सेकंदांच्या फरकाने हा चालक मोठ्या अपघातापासून वाचला आहे.
व्हिडीओत दिसते की, रस्त्याच्या मधोमध लावलेले मोठे एलआयसीचे बॅनर असलेले होर्डिंग पावसाच्या व वार्‍याच्या तडाख्याने कोसळले. त्याच वेळी तिथून एक रिक्षा जात होती. प्रसंगावधान राखून रिक्षाचालकाने तातडीने ब्रेक लावला आणि तो रिक्षातून बाहेर पडला. त्याच क्षणी होर्डिंग त्याच्या रिक्षावर कोसळले आणि ती रिक्षा पूर्णपणे दबली गेली. जर रिक्षाचालकाने थोडासा उशीर केला असता, तर मोठा अपघात होण्याची शक्यता होती.
व्हिडीओमध्ये आणखी एक गोष्ट दिसते की, काही लोक घटनास्थळी होते आणि त्यापैकी एका व्यक्तीने होर्डिंग कोसळण्यापूर्वीच मोठ्याने आवाज देऊन चालकाला सतर्क केले. या सतर्कतेमुळेच चालक आपला जीव वाचवू शकला. हा प्रकार कुठे घडला याची अचूक माहिती अद्याप समोर आलेली नाही, पण काही माहितीपत्रकांनुसार हा प्रकार छत्तीसगडच्या रायपूरमध्ये घडला असावा, असे सांगितले जात आहे.
पाहा व्हिडिओ
याआधीही अशाच प्रकारची घटना मुंबईच्या घाटकोपरमध्ये घडली होती. त्या अपघातात १७ लोकांचा मृत्यू झाला होता आणि सुमारे ७५ जण जखमी झाले होते. हा प्रकार लक्षात घेता, रस्त्याच्या जवळ किंवा रस्त्यावर मोठी होर्डिंग बसवताना काळजी घेणे अत्यंत आवश्यक आहे. सोशल मीडियावर व्हिडीओ पाहणाऱ्यांनीदेखील आपले मत मांडले आहे.
अनेकांनी रिक्षाचालकाच्या सतर्कतेचे कौतुक केले आहे; तर काहींनी होर्डिंग सुरक्षिततेबाबत चिंता व्यक्त केली आहे. काहींनी प्रतिक्रिया देत असे म्हटले आहे की, जर लोक सतर्क झाले नसते तर प्राणघातक घटना घडू शकली असती. काहींनी तर प्रशासनाला रस्त्यावरील होर्डिंगसाठी कडक नियम घालण्याची सूचना केली आहे.
या प्रकाराने पुन्हा एकदा रस्त्यावरील सुरक्षिततेची महत्त्वाची आठवण करून दिली आहे. व्हिडीओ पाहून असे स्पष्ट होते की, काही सेकंदांच्या सतर्कतेने एखाद्याचे प्राण वाचू शकतात आणि अपघात टाळला जाऊ शकतो.
