भररस्त्यात यूट्यूबर्सचा तमाशा! रिक्षाचालकाला केली मारहाण, Video पाहून नेटकरी म्हणाले..”प्रसिद्धीसाठी काहीही!”

या घटनेचा ३६ सेकंदांचा व्हिडीओ मोठ्या प्रमाणावर व्हायरल होत असून, लोकांमध्ये या घटनेबद्दल वेगवेगळ्या प्रतिक्रिया उमटत आहेत. मेहक आणि परी या दोघी त्यांच्या वादग्रस्त कंटेंटसाठी आधीपासूनच ओळखल्या जातात आणि पुन्हा एकदा त्यांनी चर्चेचा विषय बनवला आहे.

या व्हिडीओमध्ये मेहक आणि परी या दोघी एका रिक्षाचालकासोबत रस्त्याच्या मधोमध वाद घालताना दिसतात. सुरुवातीला तोंडी वाद सुरु होतो आणि काही क्षणातच दोघी आणि रिक्षाचालक एकमेकांवर हात उचलताना दिसतात. घटनास्थळी मोठी गर्दी जमते, ज्यामुळे रस्त्यावर वाहतूक कोंडी होते. काही लोकांनी हा प्रसंग मोबाईलच्या कॅमेऱ्यात शूट केला आणि तोच व्हिडीओ आता सर्वत्र शेअर केला जात आहे. काहींनी शेवटी मधे पडून दोघांना बाजूला केलं. मात्र, हा वाद नेमका कशामुळे झाला याबाबत अद्याप स्पष्ट माहिती मिळालेली नाही.

या घटनेवरून सोशल मीडियावर जोरदार चर्चा सुरू आहे. काही लोकांनी दोन्ही यूट्यूबर्सवर प्रसिद्धीसाठी नाटक केल्याचा आरोप केला आहे, तर काहींनी रिक्षाचालकाला पाठिंबा दर्शवला आहे. “प्रसिद्धीसाठी काहीही!” अशा प्रकारच्या प्रतिक्रिया मोठ्या प्रमाणावर दिसत आहेत. तर काही जणांनी म्हटले आहे की, “दोघींच्या वागण्यावरून आधीच अंदाज येतो, हे पुन्हा काही नवीन नाही.” दुसरीकडे, काही वापरकर्त्यांनी पोलिस प्रशासनावर टीका करत कारवाईची मागणी केली आहे.

पाहा व्हिडिओ

हे पहिल्यांदा नाही की मेहक आणि परी या वादात सापडल्या आहेत. यापूर्वी ऑगस्ट महिन्यात संभळ जिल्ह्यातील एका मेळाव्याजवळ त्यांच्या कारने दुचाकीला धडक दिल्याची घटना घडली होती. त्यावेळीदेखील त्यांनी मोठा गोंधळ घातला होता आणि तो व्हिडीओही सोशल मीडियावर व्हायरल झाला होता. शाहबाजपूर कलान गावातील या दोघी बहिणी इन्स्टाग्रामवर वादग्रस्त आणि “आक्षेपार्ह” व्हिडीओ टाकून प्रसिद्ध झाल्या होत्या. स्थानिक लोकांकडून विरोध होऊनही त्यांनी असे कंटेंट तयार करणे सुरूच ठेवले, ज्यामुळे पोलिसांनी यापूर्वीही त्यांच्यावर कारवाई केली होती.

सध्या मुरादाबाद पोलिसांनी या नव्या घटनेवर कोणतीही अधिकृत प्रतिक्रिया दिलेली नाही. मात्र, व्हिडीओ व्हायरल झाल्यानंतर स्थानिक नागरिक आणि सोशल मीडियावरील वापरकर्ते या प्रकाराबद्दल आपापली मते मांडताना दिसत आहेत. एका बाजूला इंटरनेटवर हा प्रसंग मनोरंजन म्हणून पाहिला जात असला, तरी दुसऱ्या बाजूला तो समाजातील नव्या प्रसिद्धी संस्कृतीवर प्रश्नचिन्ह उभे करत आहे.