वसई : अल्पवयीन भावंडांचे अपहरण करून मागितली १० लाखांची खंडणी, पोलिसांनी केली सुखरूप सुटका

वसई : वसईत राहणार्‍या एका १७ वर्षीय मुलीचे आणि तिच्या ७ वर्षांच्या लहान भावाचे १० लाखांच्या खंडणीसाठी अपहरण करण्यात आले होते. नायगाव पोलिसांनी याप्रकऱणी ३ पथके तयार करून दोन आरोपींना अटक केली आणि या मुलांची सुखरूप सुटका केली. फिर्यादी यांचे नायगावमध्ये दुकान आहे. शनिवारी त्यांची १७ वर्षांची मुलगी आणि ७ वर्षांचा मुलगा बेपत्ता झाले होते. त्यांच्या सर्वत्र शोध सुरू असताना अचानक मुलीच्या मोबाईल क्रमांकावरून फोन आला. मुलं सुखरूप पाहिजे असतील तर १० लाख खंडणी द्यावी लागेल असे अपहरणकर्त्याने सांगितले. मुलांच्या वडिलांनी त्वरीत नायगाव पोलीस ठाण्यात धाव घेतली. पोलिसांनी घटनेचे गांभिर्य ओळखून खंडणी, अपहरण आदी कलमांनुसार गुन्हा दाखल केला आणि तपासासाठी ३ पथके तयार केली.