वसई : नालासोपारा पश्चिमेच्या डांगेवाडी येथे महावितरणच्या रोहित्राचा( ट्रान्सफॉर्मर) स्फोट होऊन भीषण आग लागल्याची घटना घडली आहे. सोमवारी रात्री साडेआठच्या सुमारास ही घटना घडली. या आगीत दोघे जण होरपळून गंभीर जखमी झाले आहेत. नालासोपारा पश्चिमेच्या सोपारा गावात डांगे वाडी परिसर आहे.
याच भागात वीज पुरवठा करण्यासाठी महावितरणने रोहित्र बसविले आहे. सोमवारी रात्री अचानकपणे या रोहित्राचा स्फोट होऊन भीषण आग लागली. या घटनेमुळे आजूबाजूच्या परीसरात खळबळ उडाली आहे. या आगीत एक तरुण व चार वर्षीय मुलगी दोघे ही होरपळून गंभीर जखमी झाले आहेत.
जावेद अन्सारी( ३०) व नसरीन परवीन (४) अशी जखमींची नावे आहेत. या दोघांना स्थानिकांनी सोपारा येथील प्राथमिक रुग्णालयात उपचारासाठी नेण्यात आले होते. मात्र मोठ्या प्रमाणात आगीत ७० ते ८० टक्के होरपळून गेल्याने त्यांना मुंबईच्या रुग्णालयात उपचारासाठी पाठविण्यात आले असल्याची माहिती स्थानिकांनी दिली. या घटनेची माहिती अग्निशमन दलाला मिळताच घटनास्थळी दाखल होऊन आगीवर नियंत्रण मिळविले आहे.
सकाळ पासून पावसाची रिमझिम सुरू आहे. महावितरणाने रोहित्राची देखभाल व्यवस्थित केली नसल्यामुळे ही दुर्घटना घडल्याचे आरोप येथील नागरिकांनी केला आहे.
