सोलापुरातील दिवंगत ज्येष्ठ साहित्यिक व प्रसिद्ध वक्ते डॉ. निर्मलकुमार फडकुले यांचा बंगला फोडून चोरटय़ांनी रोख रक्कम व सोन्याचे दागिने लांबविल्याची घटना घडली. या गुन्हय़ाची नोंद सदर बझार पोलीस ठाण्यात झाली आहे.
डॉ. फडकुले यांचे चिरंजीव प्रा. डॉ. अजित फडकुले व त्यांचे कुटुंबीय उत्तर सदर बझार भागातील विद्यानगरातील ‘विवेक’ बंगल्यात राहतात. काही दिवसांपूर्वी प्रा. अजित फडकुले हे कुटुंबीयांसह थायलंड येथे सहलीला गेले होते. त्याचवेळी चोरटय़ांनी त्यांच्या बंद बंगल्यात चोरी केली. बंगल्याच्या प्रवेशद्वाराचे कुलूप तोडून चोरटय़ांनी आत प्रवेश केला. शयनगृहातील कटाप फोडून त्यातील सोन्याचे दागिने व २३ हजारांची रोकड असा एकूण ६३ हजारांचा ऐवज चोरून नेला. दिवंगत डॉ. फडकुले यांना मिळालेल्या विविध पुरस्कारांचे स्मृतिचिन्ह व इतर वस्तूंना चोरटय़ांनी हात लावला नाही.