एक सुरमयी संध्या..

वाशी येथील मराठी साहित्य व कला मंडळ आणि प्रा. माणिकराव किर्तने वाचनालय यांच्या संयुक्त विद्यमाने मंजिरी घाटे प्रस्तुत वसंत देसाई आणि सी. रामचंद्र यांच्या मराठी व हिंदी गायनाने गीतप्रेमी रसिकांचे सूर-तालाच्या कौशल्याने मन तृप्त  केले. मराठी आणि हिंदी गीतांची मैफल सूर-तालांच्या जुगलबंदीत पार पडली. या संगीतात रागदारीबरोबरच महाराष्ट्राच्या लोकगीतांचाही आविष्कार त्यांनी घडविला आहे. आजच्या रिमिक्सच्या काळातदेखील जुन्या गाण्यांवर प्रेक्षकांनी जुना काळ आठवत आनंद लुटला. या कार्यक्रमात सादर केलेल्या संगीताने स्वत:चे वेगळेपण टिकवून ठेवले होते. मंजिरी घाटे यांनी सादर केलेल्या ‘मेरे पिया गये रंगून..’ या गाण्याला तर रसिकांनी टाळ्यांच्या कडकडाटात वन्स मोरची दाद दिली. सी. रामचंद्र यांनी संगीतबद्ध केलेल्या ‘तू छुपी है कहां’ हे गाणं तर रसिकांना खूप भावले आणि सभागृहातील वातावरण अगदी प्रेममय झाले होते. त्यांनतर ‘आधा हे चंद्रमा रात आधी’ या गाण्याला तर रसिकांनी आपल्या आवाजाची साथ दिल्याने गायक आणि वादक यांचा उत्साह वाढला होता. याशिवाय अनेक लोकप्रिय गाणी प्रेक्षकांसमोर सादर केली.
कार्यक्रमाच्या अखेरीस भारताच्या सीमेवर तहानभूक विसरून सर्व देशवासीयांचे संरक्षण करणाऱ्या सैनिकांना समर्पित करून ‘ऐ मेरे वतन के लोगों..’ हे गाणे सादर केले. या वेळी प्रेक्षकांचे डोळे पाणावले होते.