कॉटेन मार्केटमधील भाजी बाजार हटविण्याच्या विरोधात आंदोलन

अडतिया संघाचे अध्यक्ष शेख हुसेन यांचा इशारा
कॉटेन मार्केटमधील भाजी बाजारातील परवानाधारक अडतिया आणि भाजी विक्रेते कळमनामध्ये स्थानांतरित झाले असल्याचा कृषी उत्पन्न बाजार समिती आणि महापालिका प्रशासनाचा दावा अडतिया संघाने फेटाळला. कॉटेन मार्केटमध्ये आजही दीडशेपेक्षा अधिक अडतिया आणि भाजी विक्रेते ठाण मांडून बसले असून हा बाजार हटणार नाही, असा इशारा देत लवकरच या विरोधात आंदोलन करण्यात असा इशारा अडतिया संघाचे अध्यक्ष शेख हुसेन यांनी दिला.
हा भाजी बाजार कळमन्यातील कृषी उत्पन्न बाजार समितीच्या जागेवर स्थलांतरित करण्याची घोषणा करण्यात आल्यानंतर काही परवानाधारक भाजी विक्रेत्यांनी कॉटेन मार्केटमधून आपले बस्तान हलविले असले तरी बाजारात किरकोळ भाजी विक्रेते आणि ग्राहकांची गर्दी दिसून आली. आजही बाजारावर फारसा परिणाम दिसून आला नाही. मोठय़ा प्रमाणात बाहेरून भाज्यांचे ट्रक आले असून भाज्यांची विक्री सुरू होती. तत्कालीन मुख्यमंत्री विलासराव देशमुख यांनी या भाजी बाजाराला उपबाजाराचा दर्जा दिला आहे. लाखोंची उलाढाल असलेल्या या बाजारातून ४० ते ५० हजार लोकांना रोजगार मिळत आहे. कळमनामध्ये खरेदी केलेला माल जात आहे आणि शेतक ऱ्यांचा माल कॉटेन मार्केटमध्येच आहे.
बाजार समितीच्या भूलथापांना बळी पडून बाजारातून कळमन्यात गेलेले विक्रेते आणि आडतिया काही दिवसात बाजारात परत येतील. शेतकरी कळमन्यामध्ये माल विकण्यास उत्सुक नाही मात्र, महापालिका प्रशासन त्यांचे ट्रक नाक्यावर अडवून ते कळमान्याला पाठवितात. पार्किंग व अन्य स्वरूपात महापालिकेला एक कोटी आणि सेसच्या स्वरूपात कळमना बाजार समितीकडे वर्षांला एक कोटी जमा होतात. स्वच्छता आणि पायाभूत सुविधांकडे दोघांचे दुर्लक्ष आहे. प्रत्येक जिल्ह्य़ात दोन ते तीन बाजार असताना नागपुरात दोन बाजार का नाही? असा सवाल हुसेन यांनी उपस्थित केला. या बाजारात २७२ परवानाधारक आहेत.
१०० विक्रेत्यांकडे परवाना नाही. महापालिकेने कळमनामध्ये नव्याने अडतिया आणि भाजी विक्रेत्यांना परवाने दिले मात्र  त्यांचे नूतनीकरण केले नाही, असा आरोप हुसेन यांनी केला. कृषी उत्पन्न बाजार समितीने भाजी विक्रेत्यांची फसवणूक केली असून कळमनामध्ये भाजी विक्रेत्यांना गाळे उपलब्ध करून देण्यासाठी मोठय़ा प्रमाणात पैसे घेतले आहेत, त्यामुळे चौकशी करण्यात यावी, अशी मागणी त्यांनी केली.