तलाव सुशोभीकरणाच्या श्रेयावरून सेना-मनसेत जुंपली

भांडुप पश्चिमेकडील शिवाजी तलाव म्हणजे अनेकांचा जिव्हाळ्याचा विषय. मात्र, झोपडपट्टीतून टाकला जाणारा कचरा, मलमूत्र विसर्जन यामुळे अनेक वर्षे हा तलाव गाळात गेला होता. सार्वजनिक गणेशोत्सव विसर्जन या तलावात होत असल्याने दरवर्षी तलावातील गाळ काढला जातो. सध्या या तलावाच्या सुशोभिकरणाचे काम सुरू आहे. परंतु त्याचे श्रेय घेण्यासाठी सेना-मनसेत जुंपली आहे. सुशोभिकरणाचे काम ९० टक्के पूर्ण झाल्यावर मनसेला जाग आल्याचा आरोप सत्ताधारी करतात तर मनसेच्या नगरसेवक-आमदारांनी पुढाकार घेऊन कामाला गती दिल्याने शिवसेनेला जाग आल्याचा मनसेचा आरोप आहे.
गेल्या अनेक वर्षांपासून शिवाजी तलावाचे सुशोभिकरण रखडले होते. गेल्या वर्षी त्याला मुहूर्त सापडून पालिकेने निविदा काढल्या. तलावाच्या कडेला भिंती बांधण्यासाठी तसेच बाजूने पदपथ करण्यासाठी कंत्राट दिले गेले. मात्र, प्रत्यक्षात अतिक्रमण असलेली बांधकामे हटवण्यास पालिकेला अपयश आल्याने कंत्राटदाराने फक्त तलावाच्या दोन्ही बाजूला आरसीसीच्या भिंती बांधून दिल्या व पुढील काम करण्यास नकार दिला त्यामुळे गेल्या वर्षी जूननंतर पुन्हा एकदा हा तलाव दुरुस्तीअभावी राहिला. यावेळी पालिकेने पुन्हा सुशोभिकरणाचे कंत्राट दिले असून तलावातील गाळ काढून झाला आहे तसेच बाजूचे खडक फोडून तलावाची खोलीही वाढवण्यात आली आहे. तलावातील गाळ काढण्यासाठी वाहन पोहोचावे यासाठी रॅम्पही बांधून पूर्ण होत आला आहे. मात्र सेना- मनसे यांच्यामध्ये श्रेयावरून वाद सुरू आहे. यातून मार्ग काढण्यासाठी पालिका आयुक्त सीताराम कुंटे यांच्याकडे शुक्रवारी संध्याकाळी उशिरा बठक सुरू होती.