खेळाडू पाहिजे नवा!

एडेल्वाइज मिड कॅप फंड

सध्या एडेल्वाइज मिड कॅप फंड या नावाने ओळखला जाणारा हा फंड जेपी मॉर्गन मिड अ‍ॅण्ड स्मॉल कॅप फंड या नावाने ओळखला जात असे. एडेल्वाइज म्युच्युअल फंडाने जेपी मॉर्गनच्या योजना खरेदी केल्यामुळे २८ नोव्हेंबर २०१६ पासून या फंडाला नवीन ओळख मिळाली. ‘सेबी’च्या नवीन वर्गीकरणानुसार हा फंड २८ मार्च २०१८ पासून एडेल्वाइज मिड कॅप फंड या नावाने आणि मिड कॅप गटात मोडणारा फंड म्हणून ओळखला जाऊ लागला आहे. समभागांच्या बाजार मूल्यांनुसार अनुक्रमे १०१ ते २५० या दीडशे समभागांत किमान ६५ टक्के गुंतवणूक करणारा हा फंड आहे. फंड व्यवस्थापक हर्षद पटवर्धन हे अमित गाडगीळ यांच्यासह या फंडाचे निधी व्यवस्थापक होते. ऑगस्ट २०१७ पासून या फंडाच्या निधी व्यवस्थापनाची पूर्ण जबाबदारी हर्षद पटवर्धन सांभाळत आहेत.

मागील दहा वर्षे या फंडात ५००० रुपयांची ‘एसआयपी’ करून ६ लाखांच्या गुंतवणुकीचे २ मे २०१८च्या रेग्युलर ग्रोथ एनएव्हीप्रमाणे २०.३६ लाख रुपये झाले आहेत. ‘निफ्टी मिड कॅप १०० टीआरआय’ हा या फंडाचा संदर्भ निर्देशांक आहे. फंडाच्या गुंतवणुकीत मागील वर्षभरात सरासरी ६० कंपन्याच्या समभागांचा समावेश असून पहिल्या पाच गुंतवणुका एकूण गुंतवणुकीच्या सरासरी १५ टक्के, १० गुंतवणुका २६ टक्के आणि १५ गुंतवणुका ३६ टक्के होत्या. ३१ मार्च २०१८ रोजी फंडाची एकूण मालमत्ता ६६९ कोटी रुपये होती. फंडाने गुंतवणुकीसाठी औद्योगिक वापराच्या वस्तूंना प्राथमिकता दिली असून त्या खालोखाल खासगी बँका, अभियांत्रिकी भांडवली वस्तू, ग्राहकोपयोगी वस्तू या उद्योगक्षेत्रातील कंपन्यांचा समावेश आहे. महिंद्र अ‍ॅण्ड महिंद्र फायनान्शियल सव्‍‌र्हिसेस, आरबीएल बँक, व्होल्टास, इंडियन हॉटेल्स, ज्युबिलिअंट फूडवर्क्‍स या पहिल्या पाच गुंतवणुका आहेत. फंडाच्या पोर्टफोलिओचे सक्रिय व्यवस्थापन केले जाते. मार्च महिन्यांत फंडाने नऊ समभाग पूर्णपणे विकून टाकले तर आठ समभागांत नव्याने गुंतवणूक केली. फंडाने १० वर्षांपेक्षा अधिक कालावधी पूर्ण केला असल्याने बाजारातील चढ-उतारांशी सामना करीत परतावा मिळविला आहे. फंड अस्तित्वात आल्यानंतर लगेचच २००८ मधील वैश्विक घसरणींना फंड सामोरा गेला तर २०१५ ते २०१८ या कालावधीतील मिड कॅप फंडांचे सुवर्णयुग अनुभवले. या चढ-उतारांतून गेल्यामुळे हा परिपक्व होत आलेला फंड आहे.

हा फंड बाजार मूल्यानुसार क्रमवारीतील तळातील कंपन्यांत गुंतवणूक करून परतावा कमविणारा फंड आहे. मिड कॅप कंपन्यांतून गुंतवणूक करण्यासाठी समभाग निवडणे हे तुलनेने कठीण काम आहे. मिड कॅप फंडात परतावा मिळविण्यासाठी समभागांचा दर्जा आणि समभागाची रोकड सुलभता यांचा तोल सांभाळणे गरजेचे असते. हा तोल निधी व्यवस्थापकांनी योग्य रीतीने सांभाळल्यामुळे फंडाच्या परताव्यात सातत्य राखणे जमले आहे.

नव्याने प्रदर्शित झालेल्या ‘शिकारी’ या मराठी चित्रपटातील ‘सीनियर प्लेयर्स थकले रे, खेळाडू पायजे नवा’ या गाण्याचा व्हिडीओ व्हॉट्सअ‍ॅपवर व्हायरल झाला (की केला गेला!) आहे. म्युच्युअल फंड आणि चित्रपट यांच्यातसुद्धा साम्य आहे, चित्रपटाचा ट्रेलर किंवा एखाद्या गाण्याचा व्हिडीओ पाहून प्रेक्षक चित्रपट पाहण्याचा निर्णय घेतात तसेच फंडाचा परतावा पाहून निर्णय घेण्याची गुंतवणूकदारांची जुनी सवय आहे. ‘मागील परतावा कामगिरी, भविष्यातील परताव्याची खात्री देत नाही’ असा इशारा वारंवार देऊनदेखील गुंतवणूकदार आपली सवय सोडत नाहीत. अशा गुंतवणूकदारांनी फारसा गाजावाजा नसलेला परंतु गुंतवणूक प्रक्रियेवर ठाम असल्याने योग्य त्या समभागांची निवड करून दर्जा आणि रोकडसुलभता यांचा समतोल राखणाऱ्या या फंडाचा नियोजनात्मक गुंतवणुकीसाठी जरूर विचार करावा.

shreeyachebaba@gmail.com

(अस्वीकृती: लेखाचा उद्देश या योजनेची वाचकांना ओळख व्हावी इतपतच मर्यादित आहे. स्तंभातील आकडेवारी व माहिती ही उपलब्ध स्रोतांपासून घेतली आहे. वाचकांनी गुंतवणूक करण्यापूर्वी आपल्या गुंतवणूक सल्लागाराचा सल्ला घेणे अभिप्रेत आहे.)