Baba Vanga Scary Predictions July 2025 : भविष्यातील घटनांबाबत जाणून घेण्यात लोकांना नेहमीच उत्सुकता असते. यात जगभरातील अनेक भविष्यवेत्त्यांनी वेळोवेळी अशी भाकिते केली आहेत, जी आश्चर्यकारकपणे खरी ठरली आहेत. यापैकी एक नाव म्हणजे बल्गेरियाचे प्रसिद्ध भविष्यवेत्ता बाबा वेंगा. इंदिरा गांधींची हत्या, ९/११ चे हल्ले आणि नैसर्गिक आपत्ती यांसारख्या बाबा वेंगांच्या अनेक भविष्यवाण्या कालांतराने खऱ्या ठरल्या आहेत. दरम्यान, त्यांची आणखी एक भविष्यवाणी आता सोशल मीडियावर चर्चेचा विषय बनली आहे, जी जुलै २०२५ मध्ये येणाऱ्या एका भयानक नैसर्गिक आपत्तीबद्दल आहे. पण, नेमकी त्यांनी काय भविष्यवाणी केली आहे जाणून घेऊया.
बाबा वेंगा यांनी जुलै २०२५ बद्दल काय भविष्यवाणी केली?
बाबा वेंगा यांनी हयातीत असताना अनेक अस्पष्ट, पण प्रभावी भाविष्यवाण्या केल्या आहेत, ज्या नंतर प्रत्यक्ष घटनांशी जोडल्या गेल्या. अशाच एका त्यांच्या भविष्यवाणीनुसार, जुलै २०२५ मध्ये जपानमध्ये विनाशकारी त्सुनामी येऊ शकते. यात २०११ मध्ये जपानला एका भयानक त्सुनामी आणि फुकुशिमा अणु संकटाचा सामना करावा लागला होता. पण, बाबा वेंगांच्या भविष्यवाणीनुसार २०२५ ची त्सुनामी २०११ पेक्षा तिप्पट जास्त विनाश घडवू शकते. जर हे खरे ठरले तर त्याचा परिणाम केवळ जपानवरच नाही तर फिलीपिन्स, तैवान, इंडोनेशियासारख्या देशांवरही होईल. किनारी भागात वसलेली शहरे आणि तेथील लोकांना मोठ्या संकटाला तोंड द्यावे लागू शकते. वैज्ञानिकदृष्ट्या जपान भूकंपाच्या क्षेत्रात येणारा देश आहे. तेथे समुद्रात जाणवणाऱ्या हालचाली सामान्य आहेत, परंतु बाबा वेंगा यांची ही भविष्यवाणी आता लोकांमध्ये चिंतेचा विषय बनली आहे.
२०२५ मध्ये युद्ध होण्याची शक्यता?
बाबा वेंगा यांनी २०२५ मध्ये केवळ नैसर्गिक आपत्तीच नव्हे तर युद्धासारख्या मोठ्या घटनांबाबतही भविष्यवाणी केली होती. भारतातील पहलगाम येथे अलीकडेच झालेल्या दहशतवादी हल्ल्यानंतर भारत आणि पाकिस्तानमधील ही भविष्यवाणी अधिक प्रासंगिक झाली आहे. भारताने कठोर पावले उचलली आहेत, ज्यामुळे दोन्ही देशांमधील संबंधांमध्ये तणाव निर्माण झाला आहे. बाबा वेंगा यांच्या भाकितांमध्ये कोणत्याही देशाचे किंवा नेत्याचे थेट नाव घेतलेले नसले तरी त्यांच्या अनुयायांचा असा विश्वास आहे की, त्यांनी दिलेले संकेत सध्याच्या परिस्थितीशी जोडून समजले जाऊ शकतात. अशा परिस्थितीत २०२५ हे वर्ष आंतरराष्ट्रीय स्तरावर अशांतता आणि संघर्षाचे संकेत देत आहे.
बाबा वेंगा कोण होते?
बाबा वेंगा यांचा जन्म बल्गेरियात झाला. लहानपणी झालेल्या एका अपघातात त्यांनी आपली दृष्टी गमावली. त्यानंतर त्यांनी स्वतःला आध्यात्मिक साधना आणि भविष्याच्या दृष्टिकोनात वाहून घेतले. त्यांनी दावा केला की, त्यांना दिव्य दृष्टी प्राप्त झाली आहे आणि ज्यामुळे ते भविष्यातील घटना पाहू शकतात. बाबा वेंगा यांनी अनेक मोठ्या घटनांविषयी भविष्यवाण्या केल्या, ज्यापैकी अनेक घटना खऱ्या ठरल्या आहेत. पण, हे देखील खरे आहे की, बाबा वेंगा यांची भाकिते खूपच अस्पष्ट होती आणि त्यात कोणत्याही स्पष्ट तारखा किंवा नावांचा समावेश नव्हता. सहसा लोक घटनेनंतर सांगितलेल्या गोष्टी त्या घटनेशी जोडतात. असे असूनही जगभरात त्यांचे अनुयायी मोठ्या संख्येने आहेत आणि लोक अजूनही त्यांनी केलेल्या भविष्यवाण्या गांभीर्याने घेतात.
यात आता बाबा वेंगा यांनी जुलै २०२५ बाबत केलेल्या भाकिताने पुन्हा एकदा लोकांचे लक्ष वेधून घेतले आहे. जपानमधील संभाव्य त्सुनामी असो किंवा भारत-पाकिस्तान तणावादरम्यान युद्धाचा धोका असो, लोक या संकेतांबद्दल सतर्क असतात. जरी वैज्ञानिक दृष्टिकोनातून आपण कोणत्याही भाकितावर आंधळेपणाने विश्वास ठेवू शकत नाही, परंतु जागरूक आणि सावध असणे नेहमीच चांगले असते. अशा परिस्थितीत बाबा वेंगा यांची ही भविष्यवाणी खरी ठरते की नाही हे येणारा काळच सांगेल.
