दहशतवाद्यांच्या पुलावामासारख्या हल्ल्याची योजना लष्कराच्या जवानांच्या सतर्कतेमुळे टळल्याची माहिती समोर आली आहे. पुलवामानजीक एका सँट्रो गाडीमध्ये IED (इंम्प्रोव्ह्ड एक्सप्लोझिव्ह डिव्हाईस) बसवण्यात आले होते. दरम्यान, बॉम्ब निकामी करणाऱ्या पथकानं वेळेत हा बॉम्ब निकामी केल्यानं मोठा अनर्थ टळला. लष्कर, सीआरपीएफ आणि पुलवामा पोलिसांनी एकत्ररित्या या गाडीची ओळख पटवली. तसंच या गाडीत IED असल्याचा शोधही घेतला. त्यानंत बॉम्ब निकामी करणाऱ्या पथकाला त्वरित घटनास्थळी बोलावण्यात आलं. त्यानंतर बॉम्ब निकामी करणाऱ्या पथकानं त्वरित तो बॉम्ब निकामी केला आणि मोठा अनर्थ टाळला. A major incident of a vehicle-borne IED blast averted by the timely input and action by Pulwama Police, CRPF and Army: Kashmir Zone Police #JammuAndKashmir pic.twitter.com/oR0aVMZYG0 — ANI (@ANI) May 28, 2020 एक दहशतवादी ही गाडी चालवत होता. परंतु सुरूवातीला करण्यात आलेल्या गोळीबारानंतर तो गाडी सोडून पळून गेला असल्याचं सांगण्यात येत आहे. अंधाराचा फायदा घेऊन दहशतवाद्यानं त्या ठिकाणाहून पळ ठोकला. दरम्यान, हे प्रकरण आता राष्ट्रीय तपास यंत्रणेकडे (एनआयए) सोपवण्यात येणार आहे. ही गाडी पुलवामातील रजपुरा रोडनजीक असलेल्या शादीपुरा येथून ताब्यात घेण्यात आली. पांढऱ्या रंगाच्या या गाडीला दुचाकीची नंबर प्लेट लावण्यात आल्याची माहिती समोर आली आहे. ही गाडीची कठुआमध्ये नोंदणी केल्याची माहितीही समोर आली आहे. जम्मू काश्मीर पोलिसांनी ही गाडी ट्रॅक केली आणि त्यानंतर यात बॉम्बचा शोध घेण्यात आला. बॉम्ब निकामी करण्यापूर्वी जवळपासचा परिसरही रिकामा करण्यात आला होता.
