हवाई दलाचं मिग 27 हे लढाऊ विमान राजस्थानच्या जैसलमेर या ठिकाणी कोसळलं. संध्याकाळी सव्वा सहाच्या सुमारास ही घटना घडली. हे विमान प्रशिक्षण देण्यासाठी वापरलं जात होतं. प्रशिक्षण देतानाच ते कोसळलं अशीही माहिती समोर येते आहे. एएनआयने यासंदर्भातले वृत्त दिले आहे. विमान कोसळताना वैमानिकाने पॅराशूटच्या मदतीने उडी मारली, ज्यामुळे त्याचे प्राण वाचले आहेत. काही दिवसांपूर्वीच हवाई दलाचं मिराज 2000 हे विमानही कोसळलं होतं त्यापाठोपाठ आता मिग कोसळल्याचीही घटना घडली आहे. जैसलमेर येथील एअरबेसवरून जेव्हा या विमानाने उड्डाण केलं त्यानंतर काही वेळातच हे विमान अपघातग्रस्त झालं.पायलटनं उडी मारून पॅराशूटच्या मदतीने स्वतःचे प्राण वाचवले. ही घटना कशी घडली याची चौकशी करण्यात येईल असं IAF च्या प्रवक्त्याने सांगितलं.
