News Flash

“करोनाकाळात जग थांबलं होतं, तेव्हा तुम्ही…!” रेल्वेमंत्री पियुष गोयल यांचं कर्मचाऱ्यांसाठी खुलं पत्र!

करोना काळातील कामगिरीसाठी रेल्वेमंत्री पियुष गोयल यांनी रेल्वे कर्मचाऱ्यांना लिहिलं खुलं पत्र!

रेल्वेमंत्र्यांचं कर्मचाऱ्यांसाठी खुलं पत्र!

गेल्या वर्षी म्हणजेच २०२०मध्ये संपूर्ण देशानं कडकडीत लॉकडाऊनचा अनुभव घेतला आहे. या काळामध्ये जीवनावश्यक सेवा वगळता सर्व काही बंद ठेवण्यात आलं होतं. या काळामध्ये रेल्वेकडून विशेष सेवा म्हणून अनेक फेऱ्या चालवण्यात आल्या. ठिकठिकाणी अडकलेल्या मजुरांसाठी देखील रेल्वे सेवा सुरू होती. लॉकडाऊनमध्येच गेलेल्या गेल्या वर्षभरात रेल्वे कर्मचाऱ्यांनी केलेल्या कामगिरीबद्दल आता केंद्रीय रेल्वेमंत्री पियुष गोयल यांनी देशभरातल्या सर्व रेल्वे कर्मचाऱ्यांना खुलं पत्र लिहिलं आहे. यामध्ये त्यांनी रेल्वे कर्मचाऱ्यांचं कौतुक करतानाच रेल्वेनं लॉकडाऊन असतानाही दिलेल्या सेवेबद्दल अभिमान व्यक्त केला आहे.

तुमच्या जिद्दीमुळेच हे शक्य झालं!

या पत्रात पियुष गोयल यांनी रेल्वे कर्मचाऱ्यांच्या पाठिवर कौतुकाची थाप टाकली. “कोविड-१९ च्या काळात आपल्या रेल्वेनं देशाच्या सेवेसाठी स्वत:ला झोकून दिलं. जेव्हा सारं जग थांबलं होतं, तेव्हा तुम्ही एकही दिवसाची सुटी न घेता अर्थव्यवस्था चालती ठेवण्यासाठी अतिजोखमीच्या वातावरणात काम करत राहिलात. तुमच्यामुळेच आपण करोना काळातही देशभरात जीवनावश्यक गोष्टींचा अविरत पुरवठा करू शकलो”, असं गोयल यांनी या पत्रात नमूद केलं आहे.

 

६३ लाख नागरिकांचं स्थलांतर!

“करोना काळात देशभरात अडकलेल्या तब्बल ६३ लाख नागरिकांची पुन्हा त्यांच्या कुटुंबीयांशी भेट घडवून आणण्याचं काम आपण केलं. यासाठी आपण ४ हजार ६२१ श्रमिक स्पेशल ट्रेन देखील चालवल्या. ३७० मोठी कामं आपण पूर्ण केली. शेतकऱ्यांचा माल थेट बाजारपेठेपर्यंत जाण्यासाठी किसान रेल सर्विसनं मोठा वाटा उचलला आहे. यातून तुम्हा लाखो देशवासीयांच्या मनात स्थान मिळवलं आहे”, असं म्हणत गोयल यांनी पत्रातून रेल्वे कर्मचाऱ्यांचं कौतुक केलं.

शेवटी या सर्व कर्मचाऱ्याचे आभार देखील रेल्वेमंत्र्यांनी मानले आहेत. “तुमची निष्ठा आणि जबरदस्त कामगिरीसाठी मी तुमचे आभार मानतो. या आत्मविश्वासाने भारलेल्या टीमसोबत आपण अजून अनेक विक्रम मोडणार आहोत, मोठमोठी लक्ष्य गाठणार आहोत, इतरांसमोर आदर्श ठेवणार आहोत आणि भारतीय अर्थव्यवस्थेत मोठं योगदान देणार आहोत”, असं गोयल यांनी पत्राच्या शेवटी म्हटलं आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on April 3, 2021 4:24 pm

Web Title: lockdown in india railway workers work piyush goyal open letter pmw 88
Next Stories
1 संतापजनक कृत्य! ट्यूशनला जाणाऱ्या विद्यार्थीनीवर सामूहिक बलात्कार; घरी येताच संपवलं आयुष्य
2 करोना उद्रेक! मृतदेहांचा लागला ढीग; अंत्यसंस्कारालाही मिळेना जागा
3 देशात मृतांच्या संख्येत मोठी वाढ; ९० हजार नागरिकांना संसर्ग
Just Now!
X