यंदाच्या रक्षाबंधनला चीनला बसणार ४ हजार कोटींचा फटका; ‘भारतीय राखी’ बांधण्याचे आवाहन

चिनी राख्यांवर बंदी घातल्यास चीनला चार हजार कोटींचे नुकसान होईल. एका आकडेवारीनुसार देशात रक्षाबंधनच्या पार्श्वभूमीवर ६ हजार कोटी रुपयांची आर्थिक उलाढाल राखी उद्योगामध्ये होते. त्यापैकी केवळ चिनी राख्यांची बाजारपेठ ही चार हजार कोटींची आहे. रक्षाबंधनच्या पारश्वभूमीवर चीनमधून या राख्या भारतामध्ये येतात. तर दुसरीकडे फोम, कागद, राखी धागा, मोती आणि राखीवरील सजावटीचे बरेचसे सामानही चीनमधून आयात होते. मात्र यंदा भारत आणि चीन संघर्षाच्या पार्श्वभूमीवर ही आयात न करण्याचा निर्णयाच कैटने घेतला आहे. यंदाची राखी ही पूर्णपणे भारतीय असावी असा आग्रह कैटचा आहे. त्यामुळेच चिनी मालाचा वापर करुन राख्या बनवू नयेत आणि त्यांच्या व्यवसायही करु नये असं आवाहन कैटने व्यापाऱ्यांना केलं आहे.

“कैटने वेगवेगळ्या राज्यांमधील आपल्या सभासदांना शहरांमधील स्वयंरोजगार निर्माण करणाऱ्या संस्था, महिला बचत गट, आंगणवाडीमध्ये काम करणाऱ्या महिलांच्या मदतीने राख्या तयार करण्यास पुढाकार घ्यावा. या माध्यमातून या महिलांना आर्थिक मदत होईल आणि पूर्णपणे भारतीय राखी बनवण्याचा हेतूही साध्य होईल,” असं मत दिल्ली विभागाचे कैटचे सुशिल कुमार जैन यांनी सांगितलं.

कैटच्या माध्यमातून भारतीय सीमेवर तैनात असणाऱ्या सैनिकांसाठीही संरक्षण मंत्री राजनाथ सिंह यांच्या मदतीने पाच हजार राख्या पाठवल्या जाणार आहेत. तसेच फेड्रेशनच्या महिला विंगच्या माध्यमातून देशभरातील वेगवेगळ्या राज्यांमध्ये नागरिकांच्या सुरक्षेचे काम करणाऱ्या पोलिसांना तसेच लष्करी रुग्णालयातील जवानांनाही राखी बांधली जाणार आहे.