“अन्यथा आम्ही आमदार अपात्रतेचा निर्णय घेऊ”, सरन्यायाधीशांनी राहुल नार्वेकरांना सुनावलं; म्हणाले, “ती वेळ…”

आम्ही निकाल देऊन (११ मे) इतके दिवस झाले आहेत, तरी तुम्ही अद्याप कोणताही निर्णय का घेतला नाही? असा प्रश्न उपस्थित करत सरन्यायाधीशांनी राहुल नार्वेकर यांना सुनावलं आहे. राहुल नार्वेकरांच्या वतीने महाधिवक्ते तुषार मेहता यांनी युक्तीवाद केला. तसेच महेता त्यांनी सर्वोच्च न्यायालयाकडे वेळ वाढवून मागितला. परंतु, वेळ वाढवून देण्यास सर्वोच्च न्यायालयाने स्पष्ट शब्दांत नकार दिला आहे. LiveLaw ने याविषयीचं वृत्त प्रसिद्ध केलं आहे.

दरम्यान, राष्ट्रवादी काँग्रेस पक्षातील अजित पवार आणि त्यांच्याबरोबरच्या आमदारांच्या अपात्रेप्रकरणीदेखील आज सुनावणी झाली. अजित पवार आणि त्यांच्याबरोबरच्या नऊ आमदारांच्या अपात्रेचा निर्णय ३१ जानेवारीपर्यंत घेण्याचे आदेश सर्वोच्च न्यायालयाने विधानसभा अध्यक्ष राहुल नार्वेकरांना दिले आहेत. हे प्रकरण जानेवारी महिन्याच्या (२०२४) पहिल्या आठवड्यात घ्यावं असंही न्यायालयाने म्हटलं आहे.

हे ही वाचा >> “आमदार अपात्रतेचा निर्णय ३१ डिसेंबरपूर्वी घ्या”, निर्देश देत सरन्यायाधीशांनी अध्यक्ष राहुल नार्वेकरांना सुनावले खडे बोल

शिवसेनेच्या आमदार अपात्रतेप्रकरणी होणाऱ्या दिरंगाईबद्दल सरन्यायाधीशांनी यावेळी नाराजी व्यक्त केली. तसेच सरन्यायाधीश धनंजय चंद्रचूड म्हणाले, विधानसभा अध्यक्ष एवढा वेळ लावणार असतील तर अशी वेळ येऊ देऊ नका की, आम्हाला आमदारांच्या पात्रता किंवा अपात्रतेचा निर्णय घ्यावा लागेल.