आसाममध्ये काँग्रेस नेतृत्वात बदल, गौरव गोगोई यांच्याकडे प्रदेशाध्यक्षपदाची सूत्रे

गोगोई यांनी मंगळवारी राजीव भवन या पक्षाच्या राज्य मुख्यालयात मावळते प्रदेशाध्यक्ष भूपेन कुमार बोरा यांच्याकडून नेतृत्वाची सूत्रे हाती घेतल्यानंतर ‘लढाई सुरू आहे’ अशी घोषणा दिली आणि निवडणुकीच्या तयारीला लागावे असा संदेश पक्ष कार्यकर्त्यांना दिला. यावेळी पक्षाचे सरचिटणीस जितेंद्र सिंह आणि विधानसभेतील विरोधी पक्षनेते देबब्रत सैकिया हे उपस्थित होते.

राज्यातील भाजप सरकारचा पराभव करण्यासाठी आपल्याला समाजाच्या सर्व घटकांनी पाठिंबा द्यावा असे आवाहन गोगोई यांनी केले. काँग्रेसला आसाममध्ये सौहार्द आणि सर्वसमावेशक विकास करणारे सरकार आणायचे आहे असे ते म्हणाले. आपला पक्ष समानता आणि समावेशकतेच्या विचारसरणीवर पुढे काम करत राहील असे गोगोई यांनी कार्यमाक्रमानंतर पत्रकारांशी बोलताना सांगितले.