icmr approves rtpcr kit for omicron test developed by tata medical and dignostics | मोठी बातमी! ओमायक्रॉनच्या चाचण्यांसाठी स्वतंत्र किटला ICMR ची मंजुरी, आता RT-PCR मधूनच होणार निदान!

ओमायक्रॉनच्या चाचण्यांसाठी Omisure हे नवं आरटीपीसीआर किट आता उपलब्ध झालं आहे.

(प्रातिनिधीक छायाचित्र)

गेल्या काही दिवसांपासून महाराष्ट्रासह देशभरात करोनाच्या नव्या व्हेरिएंटनं भितीचं वातावरण निर्माण केलं आहे. ओमायक्रॉन वेगाने जगभर पसरत असून त्यामुळे आरोग्य यंत्रणा सतर्क झाल्या आहेत. अद्याप ओमायक्रॉन जीवघेणा ठरल्याची कोणतीही माहिती आली नसल्यामुळे काहीसं दिलासादायक चित्र असलं, तरी देखील त्याचा वेगाने फैलाव होत असल्यामुळे सर्वच देशांमध्ये पुन्हा एकदा करोनाच्या रुग्णसंख्येत मोठ्या प्रमाणावर वाढ होऊ लागली आहे. या पार्श्वभूमीवर ओमायक्रॉनविरोधातील लढ्यामध्ये एक नवं साधन आरोग्य यंत्रणेच्या हाती आलं आहे.

Omisure किटमुळे चाचण्या करणं अधिक सुलभ!

आयसीएमआर अर्थात इंडियन कौन्सिल ऑफ मेडिकल रिसर्चनं ओमायक्रॉनच्या चाचणीसाठी टाट मेडिकल अँड डायग्नोस्टिक्सतर्फे तयार करण्यात आलेल्या RT-PCR किटला मान्यता दिली आहे. Omisure असं या नव्या टेस्टिंग किटचं नाव आहे. ओमिश्यूअरमुळे आता जेनोम सिक्वेन्सिंगसाठी न पाठवता देखील ओमायक्रॉनच्या बाधेचं निदान करणं शक्य होणार आहे. ओमिश्यूअर आरटीपीसीआर किट आरोग्य यंत्रणेच्या हाती आल्यामुळे ओमायक्रॉनचं लवकरात लवकर निदान करून जास्तीत जास्त व्यक्तींच्या चाचण्या करणं शक्य होणार आहे.

यासंदर्भात आयसीएमआरनं ३० डिसेबर २०२१ रोजी मंजुरीचं पत्र टाटा मेडिकल अँड डायग्नोस्टिक्सच्या नावे जारी केलं आहे. यामध्ये, “उत्पादकाच्या निर्देशांनुसारच चाचण्या केल्या जात आहेत. यासाठी बॅचनुसार चचण्यांचं सातत्य राखण्याची जबाबदारी ही उत्पादकावरच असेल”, असं नमूद करण्यात आलं आहे.

लोकसत्ता विश्लेषण: ओमायक्रॉन कमी धोकादायक का? अभ्यासातून समोर आले निष्कर्ष

भारतात ओमायक्रॉनची मोठी रुग्णवाढ!

दरम्यान, भारतात मंगळवारी ओमायक्रॉनच्या रुग्णसंख्येत मोठ्या प्रमाणावर वाढ झाल्याचं दिसून आलं. आता भारतातील ओमायक्रॉन बाधितांची एकूण संख्या १८९२ वर गेली आहे. यापैकी ७६६ रुग्ण पुन्हा निगेटिव्ह झाले आहेत. मात्र, यामुळे ओमायक्रॉन वेगाने देशात वाढत असल्याचं स्पष्ट झालं आहे. महाराष्ट्रात ओमायक्रॉन बाधितांचा आकडा सर्वाधिक ५६८ इतका आहे, तर दिल्लीमध्ये ३८२ ओमायक्रॉन बाधित आढळले आहेत. दुसरीकडे करोनाच्या रुग्णसंख्येत मंगळवारी तब्बल ३७ हजार ३७९ नव्या बाधितांची भर पडली आहे. १२४ रुग्णांचा गेल्या २४ तासांत करोनामुळे मृत्यू झाला आहे. देशाचा पॉझिटिव्हिटी रेट आता ३.२४ टक्क्यांच्या घरात आहे.

First published on: 04-01-2022 at 11:31 IST

TOPICSओमायक्रॉन Omicron करोना Corona

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Icmr approves rtpcr kit for omicron test developed by tata medical and dignostics pmw