देशातील करोनाची दुसरी लाट ओसरतांना दिसत आहे. दिवसेंदिवस करोना संसर्गाचे प्रमाण कमी होताना दिसत आहे. अनेक राज्यांमध्ये अनलॉक प्रक्रियेला सुरूवात झाली आहे. तर, करोना परिस्थिती पाहून निर्बंध टप्प्याटप्प्याने शिथिल केले जात आहेत. दररोज आढळणाऱ्या करोनाबाधितांच्या तुलनेत करोनामुक्त होणाऱ्याची संख्या वाढत आहे. मात्र अद्यापही करोनाबाधित रूग्णांची मृत्यू संख्या कमी झालेली नाही. देशात गेल्या २४ तासात ६२,२२४ नवीन करोना बाधित रुग्ण आढळले आहेत. तर १,०७,६२८ जणांनी करोनावर मात केली आहे. तसेच गेल्या २४ तासात २५४२ रुग्णांचा करोनामुळे मृत्यू झाला आहे.

केंद्रीय आरोग्य मंत्रालयाच्या दिलेल्या माहितीनुसार देशातील करोनाची परीस्थिती आटोक्यात येत आहे. आतापर्यंत देशात २,९६,३३,१०५  रुग्ण आढळले आहेत. तर २,८३,८८,१०० बाधितांनी करोनावर मात केली आहे. ३,७९,५७३ रुग्णांचा करोनामुळे मृत्यू झाला आहे. सध्या देशात ८,६५,४३२ बाधित रुग्णांवर उपचार सुरु आहेत. 

नवीन करोना रुग्णांपेक्षा बरे होणाऱ्यांची संख्या जास्त

देशात नवीन करोना रुग्णांपेक्षा बरे होणाऱ्यांची संख्या जास्त आहे. १५ जूनपर्यंत देशभरात २८,००, ४५८ नागरिकांना लस देण्यात आली आहे. आतापर्यंत २६,१९,७२,०१४ नागरीकांचे लसीकरण झाले आहे.