Jammu Kashmir News : जम्मू-काश्मीरच्या कठुआमध्ये सुरक्षा दल आणि दहशतवाद्यांमध्ये चकमक

यावेळी सुरक्षा दल आणि दहशतवाद्यांमध्ये चकमक झाल्याची माहिती सांगण्यात येत आहे. तसेच सुरक्षा दलांनी काही दहशतवाद्यांना सर्व बाजूंनी घेरल्याचंही सांगितलं जात आहे. अधिकाऱ्यांनी सांगितलं की, घटनास्थळी अधिक सैन्य पाठवण्यात आलं असून अधिक माहितीची प्रतीक्षा आहे. रविवारी सायंकाळी ५.३० वाजताच्या सुमारास पोलीस आणि सैन्य आणि सीआरपीएफचे संयुक्त पथकाने कठुआतील हिरानगर सेक्टर परिसरात मोठी शोध मोहिम राबवली. यावेळी दहशतवाद्यांनी गोळीबार सुरु केला. त्या गोळीबाराला सुरक्षा दलांच्या जवानांनी जोरदार प्रत्युत्तर दिलं.

कठुआच्या दुर्गम गावात दहशतवादी घुसल्याने जवानांनी घेराबंदी केल्याने चकमक झाली. कठुआ जिल्ह्यात सुरक्षा दल आणि दहशतवाद्यांच्या गटात झालेल्या चकमकीत एक अल्पवयीन मुलगी जखमी झाली असून तिला रुग्णालयात दाखल करण्यात आलं आहे. तिची प्रकृती स्थिर असल्याचं सांगितलं जात आहे. या संदर्भातील वृत्त न्यूज १८ ने दिलं आहे.

दरम्यान, सुरुवातीच्या गोळीबारानंतर दहशतवादी त्या ठिकाणाहून पळून जाण्यात यशस्वी झाल्याचं सागितलं जात आहे. यानंतर दहशतवाद्यांची शोध मोहीम सुरक्षा दलांच्या जवानांकडून सुरु करण्यात आली आहे. तसेच ही मोहीम उद्या आणखी तीव्र केली जाईल, असं अधिकाऱ्यांनी सांगितलं आहे. तसेच जम्मू आणि काश्मीर पोलिसांच्या विशेष ऑपरेशन्स ग्रुप, लष्कर आणि केंद्रीय राखीव पोलीस दलाच्या पथकांनी हिरानगर येथील जंगलाच्या परिसरात मोठ्या प्रमाणात शोध मोहीम सुरू केली आहे.