Wife Kills Husband : पतीच्या डोळ्यांत पत्नीने मिरची पूड टाकली, मानेवर पाय ठेवला आणि केली हत्या; कुठे घडली धक्कादायक घटना ?

नेमकी काय घटना घडली?

शंकरमूर्ती हा त्याच्या शेतात असलेल्या घरात एकटा राहात होता. त्याची पत्नी सुमंगला ही तिपतूर या ठिकाणी असलेल्या एका वसतिगृहात स्वयंपाकी म्हणून काम करत होती. त्या ठिकाणी तिची ओळख नागार्जुन नावाच्या एका माणसाशी झाली. या दोघांची मैत्री झाली आणि त्यांचे प्रेमसंबंधही जुळले. यानंतर सुमंगला आणि नागार्जुन या दोघांनीही शंकरमूर्तीची हत्या करण्याचा कट आखला. त्यानंतर २४ जूनच्या दिवशी सुमंगला आणि नागार्जुन दोघंही शंकरमूर्ती जिथे राहात होता तिथे गेले. सुमंगलाने पतीच्या डोळ्यात मिरचीची पूड टाकली, त्याच्या मानेवर पाय ठेवला आणि त्याला जबरदस्त मारहाण केली ज्यात त्याचा मृत्यू झाला अशी माहिती पोलिसांनी दिली.

शंकरमूर्तीचं प्रेत गोणीत भरलं आणि ३० किमी लांब असलेल्या विहिरीत फेकलं

सुमंगला आणि तिच्या प्रियकराने शंकरमूर्तीची हत्या केल्यानंतर त्याचं प्रेत गोणीत भरलं आणि ती गोणी त्या घरापासून ३० किमी अंतरावर एका विहिरीत फेकून दिली. सुरुवातीला शंकरमूर्ती बेपत्ता झाल्याची तक्रार नोंदवण्यात आली होती. त्यानंतर पोलिसांनी जेव्हा या घटनेचा कसून तपास केला तेव्हा त्याच्या अंथरुणात मिरची पावडरचे काही कण सापडले. तसंच त्याच्या अंथरुणाला अनेक सुरकुत्या पडल्या होत्या ज्यावरुन त्याने वाचण्यासाठी बहुदा बरीच तडफड केली असावी असा अंदाज पोलिसांनी व्यक्त केला. शंकरमूर्तीची हत्या झाली आहे असं समजून पोलिसांनी तपास सुरु केला. पोलिसांनी सुमंगला ताब्यात घेतलं आणि तिची चौकशी सुरु केली. तसंच तिचे कॉल रेकॉर्डही तपासले. ज्यानंतर तिने आपणच पतीची हत्या केल्याची कबुली दिली. या प्रकरणी गुन्हा नोंद करण्यात आला आहे आणि पुढील तपास सुरु आहे अशी माहिती पोलिसांनी दिली. एनडीटीव्हीने हे वृत्त दिलं आहे.