Dream 11 IPL 2020: गतविजेत्या मुंबई इंडियन्सवर मात आणि लगेचच दुसऱ्या सामन्यात राजस्थान रॉयल्स संघाकडून पराभव अशी स्पर्धेची संमिश्र प्रकारची सुरूवात चेन्नई सुपर किंग्ज संघाची झाली. तिसऱ्या सामन्यात चेन्नई सुपरकिंग्जचा कर्णधार महेंद्रसिंग धोनी याने नाणेफेक जिंकून प्रथम गोलंदाजी दिली. पृथ्वी शॉ आणि शिखर धवन या दोघांनी दिल्लीला दमदार सलामी मिळवून दिली. धवन आणि पृथ्वी शॉ बाद झाल्यावर ऋषभ पंत आणि कर्णधार श्रेयस अय्यर यांनी चांगली खेळी केली पण धोनीने अप्रतिम झेल टिपत अय्यरला माघारी धाडलं.
राजस्थान विरूद्धच्या सामन्यात धोनीच्या खेळीवरून त्याच्यावर टीका करण्यात आली. त्याने केलेला संथ खेळ हा कायमच चर्चेचा मुद्दा राहिला. पण आज दिल्लीविरूद्धच्या सामन्यात धोनीने आपली चपळाई पुन्हा एकदा दाखवून दिली. आधी त्याने पृथ्वी शॉ ला चपळाईने स्टंपिंग केलं. तर त्यानंतर दिल्लीचा कर्णधार श्रेयस अय्यर याचा त्याने सुंदर झेल टिपला. सॅम करनच्या गोलंदाजीवर श्रेयस अय्यरने मोठा फटका खेळण्याचा प्रयत्न केला पण त्याच्या बॅटची कड लागून चेंडू उडाला. त्यावेळी धोनी अक्षरक्ष: सुपरमॅनसारखी उडी मारून त्याचा झेल घेतला.
त्याआधी, पृथ्वी शॉ ची विकेट हा सामन्यातील चर्चेचा विषय ठरला. याचं कारण म्हणजे पुन्हा एकदा वयाच्या चाळीशीत असलेल्या धोनीचं चपळ स्टंपिंग… १३व्या षटकात पियुष चावला गोलंदाजी करत होता. त्यावेळी दुसऱ्या चेंडूवर पृथ्वी शॉ ने पुढे येऊन फटका खेळण्याचा प्रयत्न केला. त्यावेळी चेंडू त्याच्या पायाला लागला आणि धोनीच्या दिशेने गेला. पृथ्वी शॉ ला काही कळण्याआधीच धोनीने चपळाई दाखवत स्मार्ट स्टंपिंग केलं आणि पृथ्वीला माघारी धाडलं.
लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.
First Published on September 25, 2020 9:17 pm
