महालक्ष्मी मंदिर परिसरातील त्रुटींबाबत ‘हिंदू एकता आंदोलन’कडून पाहणी, व्यवस्थापनाला सूचना

गेल्या काही दिवसांपासून मंदिर व्यवस्थापन आणि कर्मचाऱ्यांच्या कामकाजाबाबत सातत्याने तक्रारी येत असल्याने ही पाहणी देवस्थान समिती व पोलीस प्रशासनाची परवानगी घेऊन करण्यात आली.

देवीची ओटी अर्पण करून भाविकांच्या समस्या लवकर सुटाव्यात यासाठी साकडे घालण्यात आले. त्यानंतर देवस्थान समितीच्या कार्यालयात हिंदू एकता आंदोलनचे जिल्हाध्यक्ष दीपक देसाई, विलास मोहिते, हिंदुराव शेळके, गणेश नारायणकर, कैलास दीक्षित यांनी देवस्थान व्यवस्थापक महादेव दिंडे यांच्याकडे सुधारणांबाबत ठोस सूचना करण्यात आल्या.

या त्रुटी चर्चेत

गरुड मंडपातील लाकडी खांबांना पडलेल्या भेगा, घाटी दरवाजाजवळील सात महिन्यांपासून बंद असलेले बॅग स्कॅनर, त्यामुळे निर्माण झालेला सुरक्षेचा गंभीर प्रश्न, मंदिरातील कर्मचाऱ्यांच्या उद्धट वर्तणुकीबाबत वारंवार येणाऱ्या तक्रारी, कर्मचाऱ्यांची आरोग्य तपासणी आदी मुद्दे देवस्थान समितीसमोर मांडण्यात आले. नागरिक, भाविकांनी मंदिर व्यवस्थापनासंबंधीच्या त्रुटी संघटनेकडे कळवाव्यात, असे आवाहन करण्यात आले आहे. या समस्याबाबतचा अहवाल जिल्हाधिकारी व पश्चिम महाराष्ट्र देवस्थान समितीकडे सादर करण्यात येणार असल्याचे दीपक देसाई यांनी सांगितले.