भारतीय क्रिकेट नियामक मंडळासाठी (बीसीसीआय) सर्वाधिक मिळकत देणारी स्पर्धा म्हणून ओळख असलेल्या इंडियन प्रीमिअर लीगच्या (आयपीएल) खेळाडूंच्या लिलाव प्रक्रियेत सकाळच्या सत्रात इंग्लंडच्या बेन स्टोक्स या अष्टपैलू खेळाडूने बाजी मारली. बेन स्टोक्सला आपल्या ताफ्यात दाखल करून घेण्यासाठी सर्वच संघ मालकांमध्ये चुरस पाहायला मिळाली. स्टोक्सवर तब्बल १४.५० कोटींची बोली लावून पुण्याच्या संघाने त्याला आपल्या ताफ्यात दाखल करून घेतले. सकाळी साडेनऊ वाजता लिलाव प्रक्रियेला सुरूवात झाली. मार्टिन गप्तीलच्या लिलावाने कार्यक्रमाला सुरूवात झाली, पण गप्तीलवर कोणत्याही संघाने बोली लावलीच नाही. त्यानंतर किंग्ज इलेव्हन पंजाबकडून वीरेंद्र सेहवागने इंग्लंडच्या इऑन मॉर्गनला दोन कोटींच्या बोलीसह संघात दाखल करून घेतले. भारताच्या इशांत शर्मावर २ कोटींची पायाभूत किंमत ठेवण्यात आली असतानाही त्यात एकाही संघाने रस दाखवला नाही. न्यूझीलंडच्या ट्रेंट बोल्टवर २ कोटींची बोली लावून कोलकाता नाईट रायडर्स संघाने त्याला ताफ्यात दाखल करून घेतले. वाचा: आयपीएल लिलावात विकले गेलेले आणि न विकले गेलेले खेळाडू कोणते? भारतीय संघाविरुद्धच्या ट्वेन्टी-२० मालिकेत अतिशय हुशारीने गोलंदाजी केलेला इंग्लंडचा टायमल मिल्स याच्यावरही चांगली बोली लागली. टायमल मिल्सला १२ कोटींंच्या बोलीसह बंगळुरूने आपल्या ताफ्यात दाखल केले. दुसरीकडे २ कोटींची पायाभूत किंमत ठेवण्यात आलेला भारताचा वेगवान गोलंदाज इशांत शर्मा यावेळी 'अनसोल्ड' राहिला. याशिवाय, चेतेश्वर पुजारा, मनोज तिवारी, आर.पी.सिंग या खेळाडूंना यावेळी कोणीच भाव दिला नाही. लिलावाच्या सकाळच्या सत्रात आतापर्यंत भारतीय खेळाडूंमध्ये कर्ण शर्मा याच्यावर सर्वाधिक ३ कोटी २० लाखांची बोली लागली आहे. तर अनिकेत चौधरीला २ कोटींचा भाव मिळाला आहे. मागील पर्वात तब्बल साडेआठ कोटींची बोली लागलेला पवन नेगी याच्यावर यावेळी केवळ १ कोटींची बोली लागली. रॉयल चॅलेंजर्स बंगळुरूने नेगीला आपल्या ताफ्यात दाखल करून घेतले. हे. दहा वर्षांच्या पहिल्या टप्प्यातील हा अखेरचा लिलाव आहे. पुढील वर्षी सर्व खेळाडू लिलावासाठी उपलब्ध असतील. एक संघ जवळपास २७ खेळाडूंना चमूत दाखल करून घेऊ शकतो. मात्र बहुतेक संघमालकांनी २२ ते २४ खेळाडूंचा चमू बनवण्यातच धन्यता मानली. १० लाख ते २ कोटींपर्यंत पायाभूत किंमत असलेले खेळाडू लिलावासाठी उपलब्ध होते. वाचा: कोण आहे कोट्याधीश टायमल मिल्स? आयपीएल लिलावाच्या पूर्वसंध्येला ऑस्ट्रेलियाचा हरहुन्नरी वेगवान गोलंदाज मिचेल स्टार्कने येत्या आयपीएल हंगामातून माघार घेतली आहे. याचप्रमाणे रॉयल चॅलेंजर्स बंगळुरू संघाशी करार संपुष्टात आणला आहे. ‘रॉयल चॅलेंजर्स बंगळुरू आणि मिचेल स्टार्क यांनी सहमतीने आगामी आयपीएल हंगामाच्या पाश्र्वभूमीवर हा निर्णय घेतला आहे. आयपीएल खेळाडूंच्या नियमावलीतील नियम क्रमांक ४१ अनुसार हा करार संपुष्टात आला आहे,’ अशी माहिती भारतीय क्रिकेट नियामक मंडळाने (बीसीसीआय) दिली.
