आयपीएलच्या बाराव्या हंगामात रॉयल चॅलेंजर्स बंगळुरु संघाची कामगिरी चांगली झालेली नाही. गुणतालिकेत सध्या तळाशी असलेला संघ, प्ले-ऑफच्या शर्यतीतून जवळपास बाहेर फेकला गेला आहे. बुधवारी घरच्या मैदानावर खेळवण्यात आलेल्या सामन्यात बंगळुरुचा सलामीवीर पार्थिव पटेलने अनोखी कामगिरी केली आहे.

मोहम्मद शमी टाकत असलेल्या सहाव्या षटकात पार्थिव पटेलने १८ धावा वसूल केल्या. आयपीएलच्या बाराव्या हंगामात एका षटकात १८ धावा काढण्याची पार्थिव पटेलची ही दुसरी वेळ ठरली आहे. महत्वाची गोष्ट म्हणजे बंगळुरुचे प्रमुख फलंदाज विराट कोहली-एबी डिव्हीलियर्स यांनाही अशी कामगिरी करता आलेली नाहीये.

दरम्यान पंजाबविरुद्धच्या सामन्यात चांगली सुरुवात होऊनही बंगळुरुचा डाव कोलमडला. पार्थिव पटेलने २४ चेंडूत ४३ धावा केल्या. या खेळीदरम्यान पार्थिवने ७ चौकार आणि २ षटकार लगावले.