IND vs AUS Ricky Ponting advises Steve Smith and Marnus Labuschagne to learn from Virat Kohli : ऑस्ट्रेलियाचा माजी कर्णधार रिकी पॉन्टिंगने बॉर्डर-गावस्कर ट्रॉफीच्या उर्वरित चार कसोटी सामन्यांमध्ये फॉर्ममध्ये परतण्यासाठी स्टीव्ह आणि मार्नस यांना भारताचा स्टार फलंदाज विराट कोहलीप्रमाणेच आपल्या खेळावर विसंबून राहण्याचा सल्ला दिला आहे. पर्थ येथे खेळल्या गेलेल्या पहिल्या कसोटी सामन्यात मार्नस लॅबुशेन भारतीय वेगवान गोलंदाजांविरुद्ध संघर्ष करताना दिसला. या सामन्यात त्याने दोन आणि तीन धावा केल्या. या सामन्यात ऑस्ट्रेलियाला २९५ धावांनी दारूण पराभवाला सामोरे जावे लागले.
स्मिथला पहिल्या कसोटी सामन्यात जसप्रीत बुमराह आणि मोहम्मद सिराजविरुद्धही संघर्ष करावा लागला. ऑस्ट्रेलियाच्या या स्टार फलंदाजाला पहिल्या डावात खातेही उघडता आले नाही, तर दुसऱ्या डावात त्याने ६० चेंडूत १७ धावा केल्या. आयसीसीच्या रिव्ह्यूमध्ये पॉन्टिंग म्हणाला, “पर्थमधील सर्व फलंदाजांपैकी मार्नसला सर्वात जास्त संघर्ष करताना दिसला. हे खरे आहे की खेळपट्टी अवघड होती आणि भारतीय गोलंदाज चमकदार गोलंदाजी करत होते पण त्यांना बदलण्याचा मार्ग शोधावा लागेल.
रिकी पॉन्टिंगचा लॅबुशेन-स्मिथला सल्ला –
या संदर्भात ऑस्ट्रेलियाच्या माजी कर्णधाराने कोहलीचे उदाहरण दिले, जो पहिल्या डावात पाच धावा केल्यानंतर बाद झाल्यानंतर दुसऱ्या डावात १०० नाबाद धावा करून पुनरागमन करण्यात यशस्वी ठरला. पॉन्टिंग म्हणाला, “विराटचा त्याच्या खेळावर विश्वास होता आणि तो पहिल्या डावाच्या तुलनेत दुसऱ्या डावात वेगळ्या खेळाडूसारखा दिसत होता. विरोधी संघाशी लढण्याऐवजी त्याने आपल्या मजबूत कौशल्यावर लक्ष केंद्रित केले. मार्नस आणि स्मिथ यांना तेच करण्याची गरज आहे. त्यामुळे मार्ग शोधा आणि दृढ निश्चय दाखवा.”
गोलंदाजांवर दबाव आणण्याचा मार्ग शोधावा –
पॉन्टिंगने ऑस्ट्रेलियन फलंदाजांना अधिक जोखीम पत्करून भारतीय गोलंदाजांवर दबाव आणण्यास सांगितले. तो म्हणाला, “तुम्हाला जोखीम पत्करून गोलंदाजांवर दबाव आणण्याचा मार्ग शोधावा लागेल. कारण बुमराहसारखे गोलंदाज तुम्हाला धावा करण्याची सहज संधी देणार नाहीत, हे आपल्या सर्वांना माहीत आहे.” पहिल्या कसोटीत दणदणीत पराभव पत्करावा लागला असला तरी पॉन्टिंगने ऑस्ट्रेलियाला संघात जास्त बदल न करता या संघासह उतरण्याचा सल्ला दिला. तो म्हणाला, “मी याच संघासह उतण्याचा सल्ला देईन. मला वाटते की तुम्हाला चॅम्पियन खेळाडूंवर विश्वास असणे आवश्यक आहे आणि या संघातील बरेच लोक चॅम्पियन खेळाडू आहेत.”
