Video: शिवम मावीने पदार्पणात केली रेकॉर्ड ब्रेकिंग कामगिरी; सामन्यानंतर म्हणाला, ‘जेव्हा मी मैदानात आलो…’

भारताकडून दीपक हुड्डा, इशान किशन आणि अक्षर पटेल यांनी फलंदाजीमध्ये चांगले योगदान दिले आहे. गोलंदाजीबद्दल बोलायचे झाले, तर शिवम व्यतिरिक्त वेगवान गोलंदाज उमरान मलिक आणि हर्षल पटेल यांनीही २-२ बळी घेतले. टी-२० मालिकेतील दुसरा सामना गुरुवार, ५ जानेवारी रोजी होणार आहे. बीसीसीआयने शिवम मावीसोबतच्या संभाषणाचा व्हिडिओ सोशल मीडियावर पोस्ट केला आहे.

यामध्ये शिवम मावीने आपल्या पहिल्या टी-२० आंतरराष्ट्रीय सामन्याबद्दल आपली प्रतिक्रिया दिली. आपल्या कामगिरीबाबत तो म्हणाला की, ”जेव्हा मी मैदानात आलो, तेव्हा स्वप्न सत्यात उतरल्यासारखे वाटले. गेल्या ६ वर्षांपासून मी याची वाट पाहत आहे. मी यापूर्वी दुखापतीने त्रस्त होतो.” याच कारणामुळे तो फिटनेससाठी खूप मेहनत घेत होता.

गोलंदाजी प्रशिक्षक पारस म्हांबरे यांनी त्याला विचारले की, पहिल्या सामन्यात चांगली कामगिरी करून तो काय विशेष करणार आहे. कोणाशी बोलणार? यावर मावी म्हणाला की, ”मी घरच्यांशी कॉलवर बोलून झोपणार आहे. कारण पुढचे वेळापत्रक खूप व्यस्त आहे.”

पदार्पणाच्या सामन्यात ४ विकेट्स घेणारा मावी भारताचा तिसरा गोलंदाज –

नवीन चेंडूने गोलंदाजी करण्याबाबत, मावी म्हणाला की, त्याची नजर विकेट घेण्यावर असते. शिवम पहिल्या सामन्यातही अशी कामगिरी करण्यात यशस्वी ठरला. ४ षटकांत प्रत्येकी एक विकेट घेण्यात तो यशस्वी ठरला. याआधी बरिंदर स्रान आणि प्रग्यान ओझा यांनी भारतासाठी टी-२० आंतरराष्ट्रीय पदार्पणाच्या सामन्यात ४-४ विकेट घेतल्या होत्या. त्यामुळे आता अशी कामगिरी करणारा मावी भारताचा तिसरा गोलंदाज ठरला आहे.

पाच दिवसात ३ टी-२० सामने –

भारताला श्रीलंकेविरुद्ध ५ दिवसांत ३ टी-२० सामने खेळायचे आहेत. दुसरा सामना पुण्यात ५ जानेवारीला तर शेवटचा सामना राजकोटमध्ये ७ जानेवारीला होणार आहे. यानंतर १० ते १५ जानेवारी या सहा दिवसांत उभय संघांमध्ये ३ वनडे सामने होणार आहेत. याआधीही व्यस्त वेळापत्रकावर अनेकदा प्रश्न उपस्थित झाले आहेत.