हैदराबाद : गुणतालिकेत तळाशी असलेला रॉयल चॅलेंजर्स बंगळूरु संघ गुरुवारी इंडियन प्रीमियर लीग (आयपीएल) क्रिकेटमध्ये लयीत असलेल्या सनरायजर्स हैदराबादचा सामना करेल, तेव्हा त्यांचा प्रयत्न विजयी कामगिरी करण्याचा राहील. यंदाच्या हंगामात हैदराबादच्या फलंदाजांनी आपल्या खेळाने सर्वांचे लक्ष वेधले आहे. त्याचा फायदा संघालाही झाला आहे. हैदराबाद संघ सात सामन्यांत पाच विजय नोंदवत गुणतालिकेत १० गुणांसह तिसऱ्या स्थानावर आहे. तर, बंगळूरुच्या संघाला आठ सामन्यांत केवळ एकच विजय मिळवण्यात यश आले. त्यामुळे हैदराबादविरुद्ध कामगिरी उंचावण्याचा त्यांचा प्रयत्न राहील. हैदराबाद संघ घरच्या मैदानावर खेळणार आहे. त्यातच फलंदाजांसह त्यांचे गोलंदाजही चांगली कामगिरी करताना दिसत आहेत. त्यामुळे बंगळूरुसाठी हैदराबादविरुद्धचे आव्हान सोपे नसेल.
क्लासन, अभिषेकवर नजर
हैदराबादकडून सलामीवीर ट्रॅव्हिस हेडने आपल्या खेळाने सर्वांचे लक्ष वेधले आहे. अभिषेक शर्मानेही हेडला चांगली साथ दिली आहे. हेन्रिक क्लासननेही या हंगामात चांगली फलंदाजी केली आहे. फलंदाजांनी चांगली धावसंख्या उभारल्याने गोलंदाजांनाही मदत मिळत आहे. कर्णधार पॅट कमिन्स, टी. नटराजन, मयांक मरकडे यांनीही चमक दाखवली आहे.
हेही वाचा >>> VIDEO : “महागडा सलमान खान” आयपीएलदरम्यान युजवेंद्र चहलचा ‘राधे भाई’ अवतार पाहून तुम्हीही हसून व्हाल लोटपोट
डय़ुप्लेसिस, कार्तिकवर मदार
बंगळूरुच्या फलंदाजांनी या हंगामात चमक दाखवली आहे. विराट कोहली या हंगामात आतापर्यंत ३७९ धावा करत सर्वात यशस्वी फलंदाज आहे. मात्र, त्याच्या कामगिरीचा फायदा संघाला झालेला दिसत नाही. कर्णधार फॅफ डय़ुप्लेसिस व यष्टिरक्षक फलंदाज दिनेश कार्तिकने कोहलीला चांगले सहकार्य केले आहे. मात्र, इतर फलंदाजांनी निराशा केली. यश दयाल हा त्यांचा यशस्वी गोलंदाज असून त्याने सात गडी मिळवले आहेत. संघाला या सामन्यात चांगली कामगिरी करायची झाल्यास त्यांच्या गोलंदाजांकडून प्रभावी कामगिरीची अपेक्षा असेल.
’ वेळ : सायं. ७.३० वा. ’ थेट प्रक्षेपण : स्टार स्पोर्ट्स १, १ हिंदी, जिओ सिनेमा.
