IPL 2019: जसप्रीत बुमराह जगातला सर्वोत्तम गोलंदाज – सचिन तेंडुलकर

बुमरहाने त्याच्या वाटयाच्या चार षटकांमध्ये १४ धावा देत दोन गडी बाद केले. सध्याच्या घडीला जसप्रीत बुमराह जगातला सर्वोत्तम गोलंदाज आहे. त्याची सर्वोत्तम कामगिरी अजूनही बाकी आहे असे मला वाटते अशा शब्दात सचिनने जसप्रीत बुमराहच्या गोलंदाजीचे कौतुक केले. सचिन तेंडुलकर मुंबई इंडियन्स संघाचा मार्गदर्शक आहे. जुलै महिन्यात इंग्लंडमध्ये होणारी विश्वचषक स्पर्धा भारताला जिंकायची असेल तर बुमराहला महत्वाची भूमिका बजावावी लागेल असे सचिनने म्हटले आहे.

बुमराह त्याची अखेरची दोन षटके टाकण्यासाठी आला त्याआधीच्या षटकात लसिथ मलिंगाने २० धावा दिल्या होत्या. बुमराहने आपल्या पहिल्या दोन षटकात अंबाती रायडूच्या विकेटसह फक्त सहा धावा दिल्या होत्या. बुमराहची गोलंदाजीची शैली वेगळी आहे. त्यामुळे काय गतीने चेंडू येणार आहे त्याचा फलंदाजालाही अंदाज बांधता येत नाही असे बुमराहचा मुंबई इंडियन्स संघातील सहकारी युवराज सिंग म्हणाला.