भारताचा खेळ खल्लास!

विश्वचषकाच्या सराव परीक्षेत भारतीय संघ पूर्णपणे नापास झाल्याचे दिसून आले. तिरंगी एकदिवसीय स्पर्धेत विनाविजयासह भारतीय संघाचे आव्हान संपुष्टात आले. इंग्लंडविरुद्धच्या महत्त्वपूर्ण सामन्यात भारताच्या मधल्या फेरीची हाराकिरी पुन्हा एकदा संघाला भोवली आणि अजिंक्य रहाणेच्या अर्धशतकी खेळीच्या जोरावर भारतीय संघाने २०० धावांपर्यंत मजल मारली. या आव्हानाचा पाठलाग करताना इंग्लंडचीही बिकट अवस्था होती. पण जेम्स टेलर आणि जोस बटलर यांनी अर्धशतके झळकावत संघाला तीन विकेट्स राखून विजय मिळवून देण्यात मोलाचा वाटा उचलला.
इंग्लंडने नाणेफेक जिंकत भारताला फलंदाजीसाठी पाचारण केले. भारताला आतापर्यंत सलामीची समस्या भेडसावत होती, पण अजिंक्य रहाणे आणि शिखर धवन (३८) यांनी ८३ धावांची सलामी दिली. पण या चांगल्या सलामीनंतरही मधल्या फळीच्या कुचकामी कामगिरीमुळे भारताला २०० धावा करता आल्या. अजिंक्य रहाणेने संघाला चांगली सुरुवात करून देत ३ चौकार आणि एका षटकाराच्या जोरावर ७३ धावांची महत्त्वपूर्ण खेळी साकारली.
इंग्लंडसाठी २०१ धावांचे आव्हान कठीण नव्हते. पण सुरुवातीलाच त्यांना फॉर्मात असलेल्या इयान बेलच्या (१०) रूपात धक्का बसला. त्यानंतर त्यांचे फलंदाज ठरावीक फरकाने तंबूत परतायला लागले आणि त्यांची ५ बाद ६६ अशी बिकट अवस्था झाली. यामध्ये तीन बळी घेत स्टुअर्ट बिन्नीने महत्त्वाची भूमिका बजावली. भारतीय संघासाठी विजय मिळवण्याची ही नामी संधी होती. पण टेलर आणि बटलर यांनी सहाव्या विकेटसाठी १२५ धावांची मोलाची भागीदारी रचत संघाचा विजय सुकर केला. सामनावीर टेलरने चार चौकारांच्या जोरावर ८२ धावा फटकावल्या, तर बटलरने सात चौकारांच्या जोरावर ६७ धावांची खेळी साकारत टेलरला सुयोग्य साथ
दिली.