गौतम गंभीरने त्याचा आवडता बॅटिंग पार्टनर सेहवाग, तेंडुलकर नसून ‘या’ खेळाडूचे घेतले नाव; म्हणाला,“लोकांना वाटते की…”

स्पोर्ट्सकीडा वर बोलताना गौतम गंभीर म्हणाला, “माझा आवडता क्रिकेट साथीदार एम.एस. धोनी होता. लोकांना वाटतं की माझा आवडता फलंदाजी साथीदार वीरेंद्र सेहवाग होता, पण खरं तर मला धोनीबरोबर खेळायला जास्त आवडलं, विशेषत: टी-२० आणि एकदिवसीय क्रिकेटमध्ये. आम्ही एकत्र मिळून अनेक मोठ्या भागीदारी केल्या आहेत.” अनेकदा गौतम गंभीरवर धोनीविरोधात बोलल्याचा आरोप होतो, मात्र यावेळी गंभीरने एम.एस. धोनीला आपला आवडता फलंदाजी साथीदार म्हणत सगळ्यांना गप्प केले आहे. तो म्हणाला, “मी धोनीबद्दल नक्कीच बोलतो, पण मी कधी त्याच्यावर रागावलेलो नाही.”

हेही वाचा: PAK vs AUS: ऑस्ट्रेलिया दौऱ्यापूर्वी उमर गुल पाकिस्तानचा वेगवान गोलंदाजी प्रशिक्षक, सईद अजमलला मिळाली ‘ही’ जबाबदारी

गौतम गंभीरने एम.एस. धोनीचे कौतुक करण्याची ही पहिलीच वेळ नाही. याआधी त्याने अनेकदा सांगितले होते की, “एम.एस. धोनीने त्याच्या आंतरराष्ट्रीय क्रिकेटमध्ये संघासाठी आपल्या धावा पणाला लावल्या होत्या. जर महेद्रसिंग धोनीने वरच्या फळीत फलंदाजी केली असती तर त्याने अनेक विक्रम केले असते.” पुढे गंभीर असे म्हणाला होता की, “जर एमएसने तिसऱ्या क्रमांकावर फलंदाजी केली असती तर मला खात्री आहे की त्याने अनेक एकदिवसीय विक्रम मोडले असते,” तो त्या मुलाखतीत बोलताना म्हणाला.

हेही वाचा: ICC New Rule: आयसीसीने घेतला मोठा निर्णय! आता गोलंदाजांसाठीही टाईम आऊट; टी-२० मध्ये स्टॉप क्लॉकचा नवा नियम

माजी सलामीवीर फलंदाज गंभीर पुढे म्हणाला, “लोक नेहमी एम.एस. धोनी आणि कर्णधार म्हणून त्याच्या कामगिरीबद्दल बोलतात, जे अगदी खरे आहे, परंतु मला वाटते की कर्णधारपदामुळे त्याने त्याच्यातील फलंदाजाचा त्याग केला. नाहीतर तो फलंदाजीत खूप काही साध्य करू शकला असता, जे त्याने केले नाही. जेव्हा तुम्ही कर्णधार असता तेव्हा असेच होते, कारण त्यावेळी तुम्ही संघाला पुढे नेत असता आणि स्वतःला विसरता. हेच रोहित शर्माने विश्वचषक २०२३मध्ये केले.”