पीटीआय, नवी दिल्ली एकदिवसीय विश्वचषक क्रिकेट स्पर्धेच्या लांबणीवर पडत चाललेल्या कार्यक्रमाचा आराखडा भारतीय क्रिकेट नियामक मंडळाकडून (बीसीसीआय) आंतरराष्ट्रीय क्रिकेट परिषदेकडे (आयसीसी) सोमवारी सादर करण्यात आला. या आराखडय़ानुसार भारत व पाकिस्तान या पारंपरिक प्रतिस्पर्धी संघांतील सामना १५ ऑक्टोबरला घटस्थापनेच्या मुहूर्तावर अहमदाबाद येथे होण्याची शक्यता आहे. जागतिक कसोटी अजिंक्यपद सामन्याच्या अंतिम सामन्यादरम्यान विश्वचषक स्पर्धेचा कार्यक्रम जाहीर होईल असे मानले जात होते. मात्र, प्रत्यक्षात कार्यक्रमाचा आराखडाच ‘आयसीसी’कडे सादर करण्यात आला. हा आराखडा सर्व सहभागी संघांच्या क्रिकेट मंडळांकडेही पाठविण्यात आला असून, पुढील आठवडय़ात कार्यक्रमाला अंतिम स्वरूप दिले जाईल असे सांगण्यात आले आहे. विश्वचषक क्रिकेट स्पर्धेच्या कार्यक्रमाला झालेल्या उशिराबाबत मात्र, कुणी काही बोललेले नाही. स्पर्धेला चार महिने बाकी असताना अजून आराखडाच सादर करण्यात आला आहे. यापूर्वी २०१५ आणि २०१९ मध्ये झालेल्या स्पर्धेचा कार्यक्रम एक वर्ष आधी जाहीर करण्यात आला होता. पाकिस्तानचा सहभाग आणि त्यांच्या सामन्यांची केंद्रे निश्चित करण्यासाठीच कार्यक्रमाला उशीर झाला असावा असे मानले जात आहे. स्पर्धेत एकूण १० संघ खेळणार असून, आठ संघ यापूर्वीच निश्चित झाले आहेत. अन्य दोन संघ पात्रता फेरीतून निश्चित होणार आहेत. ही स्पर्धा झिम्बाब्वेला १८ जूनपासून सुरू होणार आहे. विशेष म्हणजे दोन माजी विजेते वेस्ट इंडिज आणि श्रीलंका हे दोन संघ पात्रता फेरीत खेळणार आहेत.प्रस्तावित आराखडय़ानुसार उद्घाटन आणि समारोप सोहळा अनुक्रमे ५ ऑक्टोबर आणि १९ नोव्हेंबर रोजी अहमदाबाद येथेच होणार आहे. इंग्लंड विरुद्ध न्यूझीलंड सामन्याने स्पर्धेला सुरुवात होईल. उपांत्य फेरीचे सामने १५ आणि १६ नोव्हेंबरला होणार असून, या सामन्यांची केंद्रे निश्चित झालेली नाहीत. पाकिस्तानचा सहभाग निश्चित असून, पाकिस्तानचे सामने हैदराबाद, चेन्नई, कोलकाता, बंगळूरु आणि अहमदाबाद असे पाच केंद्रांवर होतील. प्रस्तावित स्पर्धा आराखडय़ानुसार भारताचे सामने भारत वि. ऑस्ट्रेलिया, ८ ऑक्टोबर, चेन्नईभारत वि. अफगाणिस्तान, ११ ऑक्टोबर, दिल्लीभारत वि. पाकिस्तान, १५ ऑक्टोबर, अहमदाबादभारत वि. बांगलादेश, १९ ऑक्टोबर, पुणेभारत वि. न्यूझीलंड २२ ऑक्टोबर, धरमशालाभारत वि. इंग्लंड, २९ ऑक्टोबर, लखनऊभारत वि.पात्रता फेरीतील संघ, २ नोव्हेंबर, मुंबईभारत वि. दक्षिण आफ्रिका, ५ नोव्हेंबर, कोलकाताभारत वि. पात्रता फेरीतील संघ, ११ नोव्हेंबर, बंगळूरु
