WI vs AUS 1st test Scorecard: ऑस्ट्रेलिया आणि वेस्ट इंडिज यांच्यात कसोटी मालिका खेळवली जात आहे. ही मालिका वेस्ट इंडिजच्या घरच्या मैदानावर असून ऑस्ट्रेलियाचा संघ पहिल्या डावात १८० धावांवर सर्वबाद झाला. तर दुसऱ्या डावात वेस्ट इंडिजचा संघ फक्त १८० धावाच करू शकला. तर दुसऱ्या डावात आता ऑस्ट्रेलिया संघाने पंचांच्या निर्णयाच्या जोरावर आघाडी घेतली आहे.
बार्बाडोसमधील केन्सिंग्टन ओव्हल येथे सुरू असलेल्या पहिल्या कसोटी सामन्यात ऑस्ट्रेलियाने वेस्ट इंडिजवर ८२ धावांची एक छोटीशी पण महत्त्वाची आघाडी मिळवली, कारण पंचांच्या वादग्रस्त निर्णयांच्या मालिकेने या सामन्याला रोमांचक वळण दिले.
कसोटीच्या दुसऱ्या दिवशी वेगवान गोलंदाजांनी वर्चस्व गाजवलं आणि फलंदाजांचा धावा करण्यासाठी कस लागला. ऑस्ट्रेलियाच्या पहिल्या डावातील १८० धावांच्या प्रत्युत्तरात वेस्ट इंडिजने ४ बाद ५७ धावांसह दुसऱ्या दिवशी सुरूवात केली. सकाळच्या सत्रात कर्णधार रोस्टन चेस आणि पुनरागमन करणारा कसोटी फलंदाज शे होप यांच्यात ६७ धावांची भागीदारी झाली, ज्यामुळे यजमान संघ पहिल्या डावात आघाडी मिळविण्याच्या दिशेने अग्रेसर होते. परंतु लंचच्या दरम्यान तिसऱ्या पंचांच्या दोन वादग्रस्त निर्णयांमुळे सामन्यात ऑस्ट्रेलियाने पुनरागमन केलं.
थर्ड अंपायरच्या निर्णयामुळे रोस्टन चेस कसा झाला बाद?
वेस्ट इंडिजचा कर्णधार रोस्टन चेस कमिन्सच्या गोलंदाजीवर ४४ धावांवर पायचीत झाला. त्याने लगेचच लगेचच रिव्ह्यूची मागणी केली आणि त्याला खात्री होती की चेंडू बॅटला लागून पॅडला लागला आहे. पण तिसऱ्या पंचांनीही त्याला रिव्ह्यू पाहिल्यानंतर बाद दिलं. पंचांच्या निर्णयामुळे रोस्टन चेस १०८ चेंडूत ५ चौकारांसह ४८ धावा करत बाद झाला.
शे होप खरंच झेलबाद होता का?
रोस्टन चेसच्या विकेटनंतर काही वेळातच चार वर्षांनंतर पहिलाच कसोटी सामना खेळणाऱ्या शे होपला ब्यू वेबस्टरने अ‍ॅलेक्स कॅरीच्या हाती झेलबाद केलं. ऑस्ट्रेलियन यष्टीरक्षकाने पुढे जाऊन एका हाताने झेल घेतला. टेलिव्हिजन रिप्लेवरून असे दिसून आले की चेंडू मैदानावर आदळला असावा, परंतु थर्ड अंपायर एड्रियन होल्डस्टॉकने ऑस्ट्रेलिया संघाच्या बाजूने निकाल दिला. होप ४८ धावांवर बाद झाल्याने विंडिजचा संघ बॅकफूटवर गेला.
लंचब्रेकपूर्वी पाच बाद १३५ धावांवरून यजमान संघ १९० धावांवर गारद झाला आणि १० धावांची आघाडी घेतली. कमिन्स आणि वेबस्टर यांनी चांगली गोलंदाजी केली तर स्टार्क आणि लायनने त्यांना चांगली साथ देत वेस्ट इंडिज संघाला गुंडाळलं.
ऑस्ट्रेलियाचा दुसरा डाव पहिल्या डावासारखाच सुरू झाला आणि संघाने झटपट विकेट गमावले. उस्मान ख्वाजाला अल्झारी जोसेफने १५ धावांवर पायचीत केलं, त्यानंतर सॅम कोन्स्टास पाच धावांवर बाद झाला. वेस्ट इंडिजच्या खेळाडूंनी संघाचा वेगवान गोलंदाज शमार जोसेफच्या गोलंदाजीवर तब्बल ५ झेल सोडले, ज्यामुळे संघाचा कोच डॅरेन सॅमी प्रचंड वैतागलेला दिसला.
जोश इंग्लिसला जेडेन सील्सने क्लीन बोल्ड केलं. तर कॅमेरून ग्रीन १५ धावांवर ग्रीव्हजच्या गोलंदाजीवर बाद झाला. ऑस्ट्रेलियाचा संघ सध्या ४ बाद ९२ धावांवर खेळत असून संघाकडे ८२ धावांची आघाडी आहे. ट्रॅव्हिस हेड (२६) आणि ब्यू वेबस्टर (१७) हे खेळाडू नाबाद परतले आहेत.
