Cucumber Health Benefits: काकडी ही एक हायड्रेटिंग थंडगार भाजी आहे, जी उन्हाळ्याच्या दिवसात खाणं विशेषतः फायदेशीर मानले जाते. अलीकडेच सोशल मीडियावर व्हायरल झालेल्या एका रीलमध्ये असे सुचवण्यात आले आहे की, काकडी फक्त सकाळीच सैंधव मीठासोबत खावी आणि रात्री किंवा दह्याबरोबर खाणे टाळावी. अशा शिफारसी पारंपरिक समजुतींमध्ये रुजलेल्या असल्या तरी, सांस्कृतिक पद्धतींना पुराव्यावर आधारित पोषणापासून वेगळे करणे महत्त्वाचे आहे.
चेन्नईतील श्री बालाजी मेडिकल कॉलेज अँड हॉस्पिटलमधील द क्लेफ्ट अँड क्रॅनियोफेशियल सेंटरमधील नोंदणीकृत आहारतज्ज्ञ दीपलक्ष्मी यांच्या मते, सकाळी किंवा मध्यरात्री काकडी खाणे खरोखरच फायदेशीर आहे, विशेषतः उष्ण हवामानात.
“त्यात पाण्याचे प्रमाण जास्त असल्याने द्रवपदार्थ पुन्हा भरण्यास मदत होते आणि त्यातील सौम्य फायबर पचनास मदत करते. चिमूटभर सैंधव मिठासह लावून खाल्ल्याने पोटफुगीचा त्रास असलेल्यांना मदत होऊ शकते आणि चव वाढू शकते, परंतु संयम महत्त्वाचा आहे. जास्त मीठ, अगदी सैंधव मीठदेखील सोडियमचे सेवन वाढवू शकते,” असे त्या म्हणाल्या.
काकडी खाण्याची योग्य वेळ कोणती?
त्यांनी नमूद केले आहे की, रात्रीच्या जेवणात काकडी पूर्णपणे टाळण्याचे कोणतेही वैज्ञानिक कारण नाही. “जरी संवेदनशील पचनसंस्था असलेल्या काही लोकांना रात्री कच्च्या भाज्या खाल्ल्याने पोटफुगीचा त्रास होऊ शकतो, परंतु हा त्रास प्रत्येकालाच होत नाही. व्यवस्थित पचन केल्यास काकडी रात्रीच्या जेवणात सुरक्षितपणे समाविष्ट केली जाऊ शकते,” असे दीपलक्ष्मी म्हणाल्या.
त्याचप्रमाणे काकडी दह्यासह एकत्र करू नये, या गोष्टीचे कुठेही पुरावे नाहीत असे त्यांचे मत आहे. खरं तर, काकडीचा रायता हा एक पारंपरिक आणि पौष्टिक पदार्थ आहे जो हायड्रेशन, फायबर आणि आतड्यांना अनुकूल प्रोबायोटिक्स देतो. बहुतेक लोकांसाठी हे मिश्रण केवळ सुरक्षितच नाही तर पचनासदेखील मदत करते.
काकडीचा जास्तीत जास्त फायदा घेण्यासाठी ती पूर्णपणे धुणे, दोन्ही टोके कापणे आणि जर ती सेंद्रिय नसेल तर सोलणे चांगले, जेणेकरून कीटकनाशकांचा धोका कमी होईल. पचनसंवेदनशीलता असलेल्यांना बिया काढून टाकल्यानेदेखील फायदा होऊ शकतो.
काकडीचे आरोग्यदायी फायदे
“काकडी हे अविश्वसनीयपणे बहुमुखी आहे आणि विविध प्रकारच्या पदार्थांमध्ये त्यांचा समावेश करता येतो. “सॅलेडमध्ये कापलेले असोत, स्मूदीमध्ये मिसळलेले असोत किंवा सँडविचमध्ये असो काकडी जेवणात पोत, चव आणि पौष्टिक मूल्य वाढवतात,” असे आहारतज्ज्ञ आणि प्रमाणित मधुमेह शिक्षक डॉ. अर्चना बत्रा यांनी indianexpress.com ला सांगितले.
काकडीमध्ये भरपूर प्रमाणात फायबर असते, जे पचनक्रियेसाठी आवश्यक असते. तुमच्या आहारात काकडींचा समावेश केल्याने आतड्यांची नियमित हालचाल होते आणि बद्धकोष्ठता टाळण्यास मदत होते. खरं तर त्यात बीटा-कॅरोटीन आणि फ्लेव्होनॉइड्ससारखे अँटीऑक्सिडंट्स असतात, जे शरीरातील हानिकारक मुक्त रॅडिकल्सना निष्क्रिय करण्यास मदत करतात. पेशींना नुकसान होण्यापासून वाचवण्यासाठी आणि दीर्घकालीन आजारांचा धोका कमी करण्यासाठी अँटीऑक्सिडंट्सने समृद्ध असलेले अन्न सेवन करणे महत्त्वाचे आहे.
“पोषक, फायटोन्यूट्रिएंट्स आणि अँटिऑक्सिडंट्सचा खजिना” म्हणून संबोधून जे त्याला सर्व आरोग्य फायदे देते, नोंदणीकृत आहारतज्ज्ञ गरिमा गोयल म्हणाल्या की वजन कमी करू इच्छिणाऱ्यांसाठी ही भाजी एक उत्तम स्नॅकिंग पर्याय आहे.
“हे दोन वैशिष्ट्यांमुळे आहे. ही भाजी ९० टक्क्यांहून अधिक पाणी आहे आणि खूप हायड्रेटिंग आहे. बहुतेक पाणी असल्याने त्यात कॅलरीज खूप कमी असतात, परंतु तृप्तता येते आणि तुम्हाला भूक लागत नाही. दुसरे म्हणजे, त्यात विरघळणारे फायबरचे प्रमाण जास्त असते, जे तुमच्या मलाला आकार देते आणि आतड्यांची हालचाल सुलभ करते, ज्यामुळे शरीरातील विषारी पदार्थ बाहेर पडतात आणि ते डिटॉक्सिफाय होतात,”
“जरी अधिक मानवी संशोधनाची आवश्यकता असली तरी प्राण्यांच्या चाचण्या आणि टेस्ट ट्यूब अभ्यासातून असे दिसून आले आहे की, मधुमेहींना काकडीचा फायदा रक्तातील साखरेची पातळी कमी करून आणि मधुमेहाच्या गुंतागूंत रोखून होऊ शकतो,” असे गोयल म्हणाले.
