ठाण्यामध्ये शिवसेना मोदीभरोसे..

एखादी मोहीम सुरू होताच सेनापती ती अध्र्यावर सोडून अचानक दुसऱ्या कामगिरीवर निघून गेला तर सैन्याची अवस्था नेमकी कशी असेल. अशीच काहीशी अवस्था गेल्या महिनाभरापासून ठाण्यातील शिवसैनिकांची झाली आहे. एकनाथ िशदे यांच्यासारखा खंदा नेता कल्याणमध्ये चिरंजीवाच्या व्यूहरचनेत अडकून पडल्याने ठाण्यावर भगवा फडकविण्याची मोहीम सर करताना शिवसेनेला अक्षरश घाम फुटू लागला आहे. तरीही नरेंद्र मोदी यांच्या लाटेवर स्वार होऊन आपण दिल्ली गाठूच, असा विश्वास शिवसेनेच्या नेत्यांना वाटत आहे. ठाण्यासारख्या बालेकिल्ल्यात विस्कळीत प्रचार आणि आर्थिक रसदेचा अभाव यामुळे शिवसेनेच्या गोटात सावळागोंधळ असला तरीही पालकमंत्री गणेश नाईक आणि विद्यमान खासदार संजीव नाईक यांना यंदाची निवडणूक सोपी राहिलेली नाही. ठाणे, नवी मुंबई, मीरा-भाईंदर या शहरांमध्ये मोठय़ा संख्येने असलेला गुजराथी-मारवाडी समाज यंदा नेमकी कोणती भूमिका घेतो, यावरही बरेच काही अवलंबून आहे. त्यामुळे ठाण्यावर भगवा फडकविण्यासाठी शिवसेनेला स्वपक्षाच्या करिष्म्यापेक्षा मोदी हवेवर अवलंबून राहावे लागत असल्याचे चित्र आहे.  
ठाणे लोकसभा मतदारसंघात ठाण्यातील तीन, नवी मुंबईतील दोन तर मीरा-भाईंदर परिसरातील एका विधानसभा मतदारसंघाचा समावेश होतो. सुमारे २१ लाख मतदार असलेल्या या मतदारसंघात ठाण्यातील दहा लाख तर नवी मुंबई, मीरा-भाईंदर परिसरातील सुमारे ११ लाख मतदारांचा समावेश होतो.
शिवसेनेने या मतदारसंघातून ठाणे शहराचे आमदार राजन विचारे यांना उमेदवारी दिली आहे. ठाण्यातील उमेदवार ही बाब विचारे यांच्या पथ्यावर पडणारी असली तरी प्रचारादरम्यान घरच्या मैदानातूनच त्यांना संघटनेची हवी तशी साथ मिळत नव्हती, असे दिसून आले. नवी मुंबईसारख्या बालेकिल्ल्यात मोठे मताधिक्य पदरात पाडून घेताना नाईक यांना यावेळी कसरत करावी लागेल, असे चित्र आहे.  संजीव नाईक यांचा व्यक्तिगत जनसंपर्क ही त्यांच्यासाठी या भागात जमेची बाजू आहे. मनसेने येथून शिवसेनेतून आयात केलेले अभिजीत पानसे यांना उमेदवारी दिली असली तरी संघटनात्मक पातळीवर मनसेचे अक्षरश: तीनतेरा वाजल्याने पानसे यांना मतदारांपर्यंत पोहचविताना पदाधिकाऱ्यांना बरीच कसरत करावी लागत आहे. विशेष म्हणजे, राज ठाकरे यांच्या ठाण्यातील जाहीर सभेलाही अपेक्षित प्रतिसाद मिळाला नसल्याने मनसेच्या गोटात अस्वस्थता आहे. आम आदमी पक्षाकडून संजीव साने आणि धर्मराज्य पक्षाकडून नितीन देशपांडे हे दोन ठाणेकर उमेदवार कोणाच्या मतांवर डल्ला मारतात याकडेही सर्वाचे लक्ष लागले आहे.