अभिनेत्री ऐश्वर्या राय बच्चन आणि आराध्या बच्चन या दोघींनाही करोनाची लागण झाली आहे. अमिताभ बच्चन यांना करोनाची लागण झाल्यानंतर कुटुंबातील सदस्यांची करोना चाचणी घेण्यात आली होती. त्यात अभिषेकचा रिपोर्ट पॉझिटिव्ह आला होता. मात्र आता त्याच्या पाठोपाठ ऐश्वर्या आणि आराध्यालादेखील करोनाची लागण झाल्याचं दिसून येत आहे. तसंच जया बच्चन यांचे रिपोर्ट्स मात्र निगेटिव्ह आले आहेत. अशी माहिती राज्याचे आरोग्यमंत्री राजेश टोपे यांनी ट्विटरच्या माध्यमातून दिली. सध्या अमिताभ बच्चन व अभिषेक बच्चन यांच्यावर मुंबईतील नानावटी रुग्णालयात उपचार सुरू आहेत. दोघांनाही करोनाची सौम्य लक्षणं आहेत. बिग बींच्या जलसा आणि जनक बंगल्यातील कर्मचाऱ्यांचीही करोना चाचणी केली जाणार आहे. तसंच गेल्या दहा दिवसात जे माझ्या संपर्कात आले होते त्यांनी करोना चाचणी करुन घ्यावी असं आवाहनही अमिताभ बच्चन यांनी त्यांच्या ट्विटमध्ये केलं आहे. Smt.Aishwarya Rai Bacchan & Daughter Aaradhya Abhishek Bacchan have also been detected positive for Covid19. Smt. Jaya Bachhan ji is tested negative for covid19. We wish the Bacchan Family to get well soon with a speedy recovery. — Rajesh Tope (@rajeshtope11) July 12, 2020 "ऐश्वर्या राय-बच्चन आणि त्यांची लेक आराध्या अभिषेक बच्चन या दोघींचीही करोना चाचणी पॉझिटिव्ह आली आहे. तसंच जया बच्चन यांची चाचणी मात्र निगेटिव्ह आली आहे. बच्चन कुटुंबातील सदस्य लवकरच बरे होवोत, ही सदिच्छा", असं ट्विट राजेश टोपे यांनी केलं आहे. दरम्यान, अमिताभ बच्चन आणि अभिषेक बच्चन यांच्या पाठोपाठ ऐश्वर्या आणि आराध्यालादेखील करोनाची लागण झाल्यामुळे सध्या बच्चन कुटुंबात चिंतेचं वातावरण पसरलं आहे. तसंच काही वेळापूर्वी अनुपम खेर यांच्या आईसह कुटुंबातील अन्य तीन सदस्यांनादेखील करोना झाल्याची माहिती मिळाली आहे.