आश्रमशाळेतील पाचवीत शिकणाऱ्या मुलाचा शॉक लागून मृत्यू झाल्यामुळे संतप्त पालक आणि ग्रामस्थांनी सहाय्यक जिल्हाधिकारी आणि तहसीलदारांवर हल्ला केला. ही घटना नंदूरबार येथे घडली. विनय गौडा असे सहाय्यक जिल्हाधिकाऱ्यांचे नाव आहे. नंदूरबारमध्ये सनदी अधिकाऱ्यावर हल्ला होण्याची एकाच महिन्यातील ही दुसरी घटना आहे. नंदूरबार जिल्ह्यातील आश्रमशाळेत सचिन चंद्रसिंग मोरे हा पाचवीत शिकत होता. विजेचा शॉक लागल्याने त्याचा मृत्यू झाला. याचा जाब विचारण्यासाठी संतप्त पालक आणि ग्रामस्थांनी अधिकाऱ्यांना जाब विचारण्यास सुरूवात केली. पण समाधानकारक उत्तर न मिळाल्यामुळे अचानक जमावाने सहाय्यक जिल्हाधिकारी गौडा आणि तहसिलदारांवर हल्ला करत मारहाण केल्याचे वृत्त 'एबीपी माझा'ने दिले आहे. विशेष म्हणजे यावेळी पोलिसांचा मोठा फौजफाटा तैनात होता. दोन्ही अधिकाऱ्यांवर सरकारी रूग्णालयात उपचार करण्यात आले.
