“राज-उद्धव एकत्र यावे”, ठाकरे गटाच्या शिलेदाराची ‘मन की बात’; नांदगावकर म्हणाले, “येत्या निवडणुकीत आम्हाला…”

विधान परिषदेचे विरोधी पक्षनेते अंबादास दानवे आज (७ जून) जालना जिल्ह्यातील बदनापूर, अंबड, परतूर, घनसावंगी आणि मंठ्याच्या दौऱ्यावर असून ‘क्या हुआ तेरा वादा?’ या आंदोलनाअंतर्गत ग्रामस्थांशी संवाद साधत आहेत. दरम्यान, राज्याच्या राजकारणात सर्वाधिक चर्चा होत असलेला प्रश्न दानवे यांना यावेळी विचारण्यात आला. राज ठाकरे व उद्धव ठाकरे एकत्र येतील का? या प्रश्नावर दानवे म्हणाले, “उद्धव ठाकरे आणि राज ठाकरे एकत्र आले तर त्याचा आम्हाला आनंदच होईल. ते दोघे एकत्र येण्याची आमचीही इच्छा आहे”.

दरम्यान, सरकारविरोधातील आंदोलनाबाबत दानवे म्हणाले, “सरकारने निवडणुकीआधी घोषणा फार केल्या, मात्र अंमलबजावणी शून्य आहे. लाडक्या बहिणींना दिलेलं आश्वासन सरकारने पाळावं, लाडकी बहीण योजना बंद झाली तर आम्ही आवाज उठवू. तसेच निवडणुकीआधी जाहीर केल्याप्रमाणे लाडक्या बहिणींना सरकारने दर महिन्याला २१०० रुपये द्यावे”.

मनसे – शिवसेना (ठाकरे) युतीबाबत बाळा नांदगावरकर काय म्हणाले?

बाळा नांदगावकर म्हणाले, “मनसे आजवर ‘एकला चलो रे’च्या भूमिकेत राहिली आहे. आम्ही सध्याही त्याच भूमिकेत आहोत. तर, युतीचा विषय हा पक्षप्रमुखांच्या अखत्यारित आहे. त्यावर मी बोलणं उचित नाही”. दरम्यान, त्यांना विचारण्यात आलं की तुम्हाला शिवसेनेच्या दोन्ही गटांकडून युतीसाठी विचारणा झाली असल्याची चर्चा आहे. याबाबत मनसे काय निर्णय घेणार आहे? यावर नांदगावकर म्हणाले, “मी नेहमी सकारात्मक विचार करणारा माणूस आहे. कोणीही नकारात्मक विचार करू नये असं मला वाटतं. येत्या निवडणुकीत आमच्या पक्षाला, आमच्या कार्यकर्त्यांना काय फायदा होईल याचा विचार करावा लागेल. त्यानुसारच निर्णय घेतला जाईल. मात्र युतीबाबत मी बोलणं उचित नाही”.