सावंतवाडी : सावंतवाडी शहरात आर्थिक देवाणघेवाणीवरून दोन गटात शनिवारी मध्यरात्रीच्या सुमारास झालेल्या वादातून अपहरण, अंगावर गाडी घालून ठार मारण्याचा प्रयत्न आणि घरफोडीसारख्या गंभीर घटना घडल्या आहेत. या प्रकरणी पुणे येथील पाच आणि सिंधुदुर्ग येथील चार अशा एकूण नऊ जणांवर परस्पर विरोधी गुन्हे दाखल करण्यात आले आहेत. साडेचार कोटी रुपयांच्या व्यवहारातून हा सर्व प्रकार घडल्याचे पोलिसांकडून सांगण्यात येत आहे.
गुन्ह्यांची पार्श्वभूमी आणि स्वरूप
हा सर्व प्रकार सावंतवाडी शहरातील सर्वोदय नगर येथील सागर कारिवडेकर यांच्या बंगल्याजवळ घडला. शेअर्समधील पैशांचा परतावा मिळण्यास विलंब होत असल्याने त्याबदल्यात अलिशान कार घेऊन जाण्यासाठी पुणे येथील गुंतवणूकदार सावंतवाडीत आले होते. मात्र, कारिवडेकर यांनी वेळेत फोन उचलला नसल्याने हे नाट्य घडल्याचे पोलिसांनी सांगितले.
सागर कारिवडेकर यांच्या सुपरवायझर वामन उर्फ नितीन मेस्त्री यांचे अपहरण करून त्यांना आरोस न्हावेली येथे नेऊन मारहाण केल्याप्रकरणी, तसेच कारिवडेकर यांच्या बंद सदनिकेत अनधिकृत प्रवेश करत दरवाज्याची कडी-कोयंडा उघडल्याप्रकरणी आणि सर्वोदय नगर येथील आलिशान घराच्या काचा दगडाने फोडल्याप्रकरणी पुणे येथील शंभूराजे देवकाते, शौनक सकपाळ, बॉबी काकडे, अतुल धीवरे, श्रीकांत कांबळे यांच्यावर गुन्हा दाखल करण्यात आला आहे.
पुणे येथील संशयित आरोपींनी दिलेल्या तक्रारीनुसार, शनिवारी रात्रीच्या सुमारास तहा राजगुरू याने शौनक सकपाळ आणि अशोक उर्फ बॉबी काकडे यांना जीवे ठार मारण्याच्या उद्देशाने त्यांच्या अंगावर गाडी घालून दुखापत केली, तसेच इतरांनी मिळून मारहाण केली. या प्रकरणी वामन उर्फ नितीन मेस्त्री, तहा राजगुरू, अब्दुल खान, तेयशील दरवाजकर (सर्व रा. सावंतवाडी) यांच्यावर गुन्हा दाखल करण्यात आला आहे. या गुन्ह्यांमध्ये वापरलेल्या कार जप्त करण्यात आल्या आहेत.
या घटनेनंतर पोलिसांनी तातडीने घटनास्थळी धाव घेतली. सर्वोदय नगर येथील कारिवडेकर यांच्या बंगल्यात आणि बंगल्यासमोर हा प्रकार घडला असून, पोलिसांनी घटनास्थळावर जाऊन फोरेन्सिक टीमद्वारे संपूर्ण घटनेचे ‘रिक्रिएशन’ केले आहे. रविवारी सकाळी नऊ जणांवर परस्पर विरोधी गुन्हे दाखल करण्यात आले आणि संशयित आरोपींना सायंकाळी उशिरा येथील न्यायालयात हजर करण्यात आले. न्यायालयाने या सर्व आरोपींना दोन दिवसांची पोलिस कोठडी सुनावली आहे. या घटनेचा अधिक तपास पोलीस निरीक्षक अमोल चव्हाण यांच्या मार्गदर्शनाखाली सहायक पोलिस निरीक्षक पंकज शिंदे करत आहेत.
