‘इन्फिनाईट बिकन’च्या दोन एजंटला अटक; उद्यापर्यंत कोठडी, जादा परताव्याचे आमिष दाखवत गुंतवणूकदारांची फसवणूक…

अंबादास महादेव जाधव (वय ५०, रा. दरेवाडी, अहिल्यानगर) व बाळासाहेब जानकू हिंगे (वय ४५, रा. दहिगाव साकत, अहिल्यानगर) अशी अटक केलेल्या एजंटांची नावे आहेत. न्यायालयाने त्यांना तीन दिवसांची पोलीस कोठडी सुनावल्याची माहिती तपासी अधिकारी तथा आर्थिक गुन्हे शाखेचे पोलीस निरीक्षक डॉ. शरद गोर्डे यांनी दिली. इन्फिनाईट बिकन, ट्रेड्स इन्व्हेस्टमेंट, सिस्पे आदी कंपन्यांनी केलेल्या फसवणुकीसंदर्भात तोफखाना पोलीस ठाण्यासह श्रीगोंदा व सुपा पोलीस ठाण्यांत एकूण ५ गुन्हे दाखल करण्यात आले आहेत. त्याचा एकत्रित तपास आर्थिक गुन्हे शाखेकडून सुरू आहे.

तोफखानाकडील प्रकरणात १ कोटी ६९ लाख ५० हजार रुपयांची फसवणूक झाल्याची तक्रार शिक्षिकेने केली आहे. त्यानुसार हा गुन्हा दाखल करण्यात आला आहे. शिक्षिकेला इन्फिनाईट बिकन व ट्रेड्स इन्व्हेस्टमेंट या कंपन्यांची माहिती मिळाल्यानंतर त्यांनी गुंतवणूक केली होती.

कंपनीचे सीईओ अगस्त मिश्रा व इतर संचालकांनी गुंतवणूकदारांना १० ते १२ टक्के परतावा मिळेल, तसेच कंपनी सेबीकडे नोंदणीकृत असून शेअर बाजारातून नफा मिळवून गुंतवणूकदारांना नफ्यातील हिस्सा दिला जाईल, असे आमिष दाखवत अनेक गुंतवणूकदारांची फसवणूक करण्यात आली. या कंपन्यांनी गुंतवणूकदारांना प्रलोभन दाखवण्यासाठी अनेक एजंट नियुक्त केले होते. आत्तापर्यंत २ संचालकांसह ६ एजंट अशा एकूण ८ जणांना अटक करण्यात आली आहे. संचालक मंडळाबरोबर एजंटदेखील या प्रकरणांत आरोपी ठरत आहेत. त्यामुळे एजंटांच्या धरपकडीसाठी पोलिसांनी मोहीम हाती घेतली आहे.

दरम्यान सिस्पे, ट्रेड्स, इन्फिनाईट बिकन कंपन्यांमधील गुंतवणूक घोटाळ्यांप्रकरणी आतापर्यंत आर्थिक गुन्हे शाखेच्या पोलिसांनी संशयित आरोपींच्या विविध बँक खात्यांतील सुमारे ५५ कोटी रुपयांची रक्कम गोठवली आहे. आरोपींच्या मालमत्ता, बँक खाती आणि वाहनांची माहिती गोळा करण्याचे काम सुरू असून ‘एमपीआयडी’ अंतर्गत प्रस्ताव तयार करण्याचे काम अंतिम टप्प्यात आहे. तसेच, या कंपन्यांमध्ये ज्यांनी गुंतवणूक केली आहे, अशा सर्व गुंतवणूकदारांनी आपल्या आर्थिक गुंतवणुकीसंदर्भातील कागदपत्रांसह आर्थिक गुन्हे शाखेत हजर राहून जबाब द्यावेत, असे आवाहन तपासी अधिकारी डॉ. गोर्डे यांनी केले आहे.