शिवसेना पक्ष फूटल्यानंतर निवडणूक आयोगाने एकनाथ शिंदे यांच्या गटाला मान्यता दिली. वर्षभरापूर्वी निवडणूक आयोगाने एकनाथ शिंदे यांच्या गटाला पक्ष आणि पक्षाचं अधिकृत चिन्हदेखील दिलं. निवडणूक आयोगाच्या या निर्णयावर तत्कालीन विधानसभेचे विरोधी पक्षनेते आणि आत्ताचे उपमुख्यमंत्री अजित पवार यांनी नाराजी व्यक्त केली होती. त्यावेळी अजित पवार यांनी निवडणूक आयोगाबाबत केलेलं वक्तव्य आता त्यांच्या अंगलट येण्याची शक्यता आहे. कारण, शरद पवार गटाचे समर्थक अजित पवारांच्या त्या वक्तव्याचा व्हिडीओ सोशल मीडियावर शेअर करत आहे. तसेच शरद पवार गट हा व्हिडीओ निवडणूक आयोगाकडे देणार आहे.
राष्ट्रवादी काँग्रेस पार्टीचा शरद पवार गट आणि अजित पवार गट या दोन्ही गटांनी राष्ट्रवादी पक्षावर आणि चिन्हावर दावा केला आहे. निवडणूक आयोग ६ ऑक्टोबर रोजी यावर सुनावणी घेईल. तत्पूर्वी शरद पवार गट अजित पवारांचं निवडणूक आयोगाबद्दलचं एक वक्तव्य (व्हिडीओ) निवडणूक आयोगाकडे देणार आहे. त्यामुळे अजित पवारांच्या त्या वक्तव्याचा निवडणूक आयोगाच्या निर्णयावर परिणाम होऊ शकतो, असं बोललं जात आहे.
अजित पवार तेव्हा म्हणाले होते की, निवडणूक आयोगाच्या निर्णयानंतर लोकांच्या मनात अनेक प्रश्न निर्माण झाले आहेत. निवडणूक आयोगाने म्हटलं आहे की ४० आमदार आणि काही खासदार हे एका बाजूला गेले म्हणून आम्ही पक्ष आणि चिन्ह तिकडे (शिंदे गट) दिलं. मग एखाद्या पक्षाचा एक आमदार किंवा दोन आमदार असतील. हे एक-दोन आमदार दुसऱ्या बाजूला गेले तर काय होईल? मनसेचं उदाहाण घ्या. मनसेचा एक आमदार आहे. उद्या तो आमदार म्हणाला, मनसे माझी, इंजिन माझं (पक्षाचं चिन्ह) आणि पक्षही माझा, तर तेव्हादेखील तुम्ही तसाच निर्णय देणार का?
हे ही वाचा >> मोठी बातमी! मुख्यमंत्र्यांपाठोपाठ विधानसभा अध्यक्षांचा परदेश दौरा रद्द, कारण काय?
अजित पवारांचा हा व्हिडीओ शरद पवार गट निवडणूक आयोगाला देणार आहे. दरम्यान, यावर पक्षाचे प्रदेशाध्यक्ष जयंत पाटील यांनी भाष्य केलं आहे. जयंत पाटील म्हणाले, त्या व्हिडीओत अजित पवार असं सांगतायत की, मनसेचा एक सदस्य गेला की मनसेचा पक्ष त्याच्याबरोबर जाईल का? अजित पवार नेहमीच योग्य बोलतात, ते नेहमीच खरं बोलतात. त्यामुळे मला वाटतं, त्यांची जी भूमिका आहे ती उशिरा का होईना निवडणूक आयोगाने लक्षात घ्यावी.
